زستـــانى ٢٠٠٩ و دەسەڵات،

بێزارى و نائومێدى بۆ تاکى کورد دێنن.

   
حەمەى ئەحمەد ڕەسوڵ

لەڕاستیدا وەرزى زستان، وەرزى سەرما و سۆڵە و چوونە ژوورەوە و ڕۆژ کورتى و خەڵوەت دروستکردنە لەماڵەوە ... بەپێچەوانەى هاوینەوە کەپڕو سیخناخە لە ڕوناکى و گەرمى و سەیران و گەڕان بە دەشت و دەر و دەرەوەى ماڵەوەدا ، گرنگترین ئامراز ، وەرگرتنى هەوایەکى فێنکە و دروستکردنى سێبەرە ..خەرجى و مەسرەفیش لەزستاندا زۆرترە وەک لەهاوین ، ئامرازەکانى خۆگەرم کردنەوە و ماڵ گەرمکردنەوە و خۆپۆشین و خۆراکى وزەوگەرمى بەخش هەموویان تێکڕا خەرجى و پارەى زۆریان ئەوێت، کەدیارە ئەمەش خەسڵەتێکە سەراپاى جیهان ئەگرێتەوە لە وەرزى زستان و سەرمادا ، بەڵام باسکردنى دڵتەنگى و بێزارى لەوەرزى زستاند و لە نیشتمانێکى وەکو کوردستاندا دیارە هۆکارى سەرەکى و فاکتەرى گرنگى خۆى هەیە و بابزانین بۆچى ئەم بارودۆخە دەروونى کۆمەڵایەتییە ڕوومان تێدەکات ؟

لە گرنگترین کار وئیشەکانى هەر دەوڵەت و دامودەزگایەک، پێشکەش کردنى خزمەتگوزارى و ڕاپەڕاندنى ئەرک و پێداویستیەکانى هاوڵاتى و دانیشتوانە ، بەتایبەت لە وەرزى دژوار و ساردى زستاندا .. هەموو وڵاتانى دونیا پێداویستیە یەکەمەکانى(کە وەکو دەڵێن ئەلفوباى خزمەتگوزارین! ) وەکو کارەب و ئاو و سووتەمەنى و نیشتەجێى و هەرزانى بازاڕ و یاساى نرخدانانى شمەک بە ئەرکى سەرتاشانى خۆى دەزانێت و بەویژدان و ئاکارى مروڤایەتى بەرزەوە ئەیبەستێتەوە ، بەرپرسانى هەموو وڵاتانى دونیا ، چ جاى وڵاتە پێشکەوتووەکان ، ئەو وڵاتانەى مافى مرۆڤ تیابەرز ڕاگیراوە و هەموو تاکێک لە کۆمەڵگاکەیاندا وەکو هاوڵاتى پلەیەک حسێبى بۆ دەکرێت لەڕووى ئەرک و مافەوە .

بەڵام بەداخەوە لەوەتەى تاکى کورد چاوى بۆ ژیان کردۆتەوە ، لە نەهامەتى و دژوارى و زەلیلیى و جەنگ و جەدەلدا ژینى بێئومێدى دەباتە سەر هیچ کام لەدەسەڵاتە تاکڕەو و دیکتاتۆرەکانى ئەم وڵاتە دەوڵەمەند و هەتیوە مافەکانى تاکى کوردى دەستەبەر نەکردوە و خزمەت و خزمەتگوزارییەکانى لەهەزار ناڵى عەلى بۆ جێبەجێکردووە و پاشان ناوى (مەکرەمە)ى لێناوە و بەمەکرەمە و دیارى یەکێک لەسەرکردە و کاریزما زۆرەکانمان ناوزەدى کردوون ، ئەم وڵاتەى ئێمە کەیەکێکە لە دەوڵەمەندترین و بەپیتترین وڵاتێک لەناوچەکەدا ، دەوڵەمەندییەکەى هۆکارێک بووە لەڕاکێشانى وەیشوومە و نائومێدى و جەنگى بەردەوام بۆ وڵاتەکە و دروستکردنى کەشوهەوایەکى دڵَتەنگ و پڕلە ناسۆرى بۆ تاکى کورد .. کەبەڕاستەوخۆى کاریگەرى هەبووە بۆ پێکهاتەى کەسایەتى و پەروەردەیى تاکى کورد .. دژوارکردن و سەختترکردنى ژیانى مرۆڤ و ڕاکردنى بەردەوامى بەدواى پێویستى و ناچارییەکانى بژێوى ژیانیدا ئەو ڕەوشەى بەرجەستەکردووە کە تاکى کورد هەمیشە تووڕە و بێزار و دڵتەنگ بێت ، هەمیشە ناچار و پێویست و نەدار و چاوەڕوان و دوودڵً و ترساو بێت لە ئایندەى خۆى و ئایندەى ڕۆڵەکانى .

مەتەڵێکى کوردى هەیە و دەبێژێت : هەر ڕادەکەیت بەدواید و نایگەتێ ! ئەم مەتەڵە دەقاودەقى بەسەرژیان و گوزەرانى ئێمەى کوردا جێبەجێ دەبێت و لەمێژە تاکى کورد فریاى کڕین و تێرکردن و مەیسەرکردنى هەموو پێداویستیەکانى ژیانى ناکەوێت ، بەتایبەتى دواى ڕاپەڕین و دروست بوونى حکومەتى خۆماڵى و دەسەڵاتى کوردى ...چونکە دواى ڕاپەڕین ئەتمۆسفیر و کەشوهەوایەک ئافەریدەبوو ، بارگاوى بوو بەئازادى و نەترسانێکى سەدا سەدى لەئایندە و لەفەوتان ..کرانەوە و سنووربەزاندنى تاکى کورد ، ئەو دۆخەى دروستکرد لە پێداویستى و ئامرازى تەکنۆلۆژیاى نوێ بەکاربێنێ و ماڵەکەى خۆى لێ پڕبکات کە لەسەردەمى دیکتاتۆریدا لێى بێبەش بوو ، سەتەلایت و مۆبایل و کۆمپیوتەر و ئینتەرنێت و ئۆتۆمبیلى مۆدێل بەرز و ڤێل و کۆشکى گەورەتر و قەشەنگتر لەجاران و چەندان پێداویستى دیکەى ژیانى نوێن و تاکى کوردى هاوچەرخ قەناعەت و چاوتێرى جارانى نەماوە ، بەڵام ڕەنگە ئەم خەسڵەتەش تەنها دووچارى تاکى کورد و ئەم دەڤەرە نەبووبێتەوە بەڵکو باهۆزى جیهانگیرى بەسەرهەموو دونیادا پەرش و بڵاوى کردۆتەوە و جیهان وەکو گوندێکى بچکۆلەى لێهاتووە و لەناوەرۆک و لەڕوخسار و لەڕەفتار و لەگوزەراندا لەیەک دەچن، تەنیا و تەنها گەندەڵى و بێ خزمەتگوزەرانى نەبێت کەتەنه و تەنها کوردستانە بێبەختەکەى ئێمەى گرتۆتەوە .

تاکى کورد چۆن دڵتەنگ و بێزار و تووڕە و بێئومێد نابێت لە هەرێمێکدا کەچۆڕێک کارەبا و جامولکەیەک ئاو و مەنجەڵێک نەوتى تێدا نەبێت و پەیداکردنێک بڕست و هێز لەمرۆڤ ببڕێت ... مرۆڤى کوردى ئەمڕۆ هەر لەخەو هەڵدەستێت کارەباى نییە بەرچاوى خۆى ببینێ ، دەست بۆ بەلوعە و دەستشۆرەکەى دەبات ئاوى پێدا نایەت یان لەشەختە و سەهۆڵبەندا بەستوویەتى یان تەقیوە و شکاوە ، دێتە کۆڵان ، قوڕ و چڵکاوە و شارەوانى بۆى قیرتاو نەکردووە ، هەتادەگاتە سەرجادە و چاوەڕێى پاسى نەفەر هەڵگر ئەکات ، کەپاش نیو کاتژمێر ئەگاتە لاى و جمەى دێت لەنەفەرى قوڕاوى و چڵکن ، چونکە لە کۆڵانەکانى سەردەمى هۆلاکۆوە هاتووە و نزیکەى مانگێکە خۆى نەشۆریوە ، لەبێ کارەبایى و بێ ئاوى و سووتەمەنیدا ، لەجیاتى بۆنى عەتر و گوڵاو ، بۆگەنى چڵک و دوکەڵى سۆپاى نەوتى پیسى لێ بەرز دەبێتەوە .

ئەم مرۆڤە کە لە مرۆڤى سەردەمى نێندەرتاڵ دەچێت خۆى و خێًزانەکەى و مناڵەکانى هەر سکاڵا و گازەندەیانە لەدەست نەبوونى و قاتوقڕى و گرانى و سەرما و سۆڵە و سەختى و ناخۆشى ژیان ...! ڕەنگە لەهاویندا قاڵبێ سەهۆڵ و دانیشتن لەباخچە و ژێر سێبەر و باوەشێنێک و خواردنى قاشێک شووتى سارد فێنکى و سازگارییەک بەدڵ و دەروونى ببەخشێ ، ڕەنگە لەهاویندا چوون بۆ سەیران و گەڕان بەهاوینە هەوارەهەتیووە و گران و بێ خاوەن و بێ پاسەوانەکانماندا تۆزێک ئاسوودەیى و بەختەوەرى و قەترەیەک حەسانەوە و پشوومان پێ ببەخشێ ، بەڵام هەرگیز لەزستاندا ، زستانى کوردستانى بێ کارەبا و بێ ئاو و بێ سووتەمەنى و گرانیدا دانیشتنى بەردەم سۆپاى کزوڕیوەڵە ئاسوودەیى و بەختەوەریمان پێنابەخشێت بەتایبەت کەشەوانى زستان درێژوتاریکن ، بەتایبەت کوردستانێک کەشەوانى زستانى ماڵەوەت لێدەکات بەگۆڕێکى زیندووى ساردوسڕ ..ئەگەر حکومەتێک گەندەڵ نەبێت ویاسا و ویژدانى کۆمەڵایەتى و دادوەرى و یەکسانى پێشێلکار نەبێت، بیر لە هاوڵاتى و هاونیشتمانى و هاونەتەوەیى خۆى دەکاتەوە .. بیر لەژیانى ملیۆنان دەکاتەوە نەک زیندە بەچاڵکردنى تاکەکانى لە گۆڕێکدا کە دڵتەنگى و بێزارى و بێ ئومێدى زیاتر هیچیکەى لێ نادروویتەوە .

تێبینی:خوێنەرى بەڕێز:نووسینى ئەم بابەتە هاندان و سکاڵاى زۆرێک لەرۆشنبیر و        برادەران و خزمانى شارى سلێمانى بوو لەدەست ئەم زستانە زستانى(٢٠٠٩)