١٦\٧\٢٠١٩

  رۆژژمێری من و تۆ.

ناڵە حەسەن

١
دەمێک لەنێو مەمکۆلە نەرمەکانی مانگ و
دەمێکیش لەبنار کێوە سەختە سەوزەکانی هەور
دەمێک لە پاڵ تەرمە پڕ برینەکانی نیشتیمان و
دەمێکیش لەنێو ئەشکەوتە شێدارەکانی دۆزەخ
دەمێک لەسەر شۆستە تاریکەکانی تەنیایی
دەمێکیش لەسەر پشتی شەپۆلە شینەکانی دەریا
دەمێک لەنێو ڕۆشنایی چاوە گەشەکانی ئەستێرە
دەمێکیش لەنێو خەیاڵە غەمگینییەکانی غوربەت
گوڵە گیانم /
هەردەڕۆم و ناگەم بەهیچ شوێن
هەر دەڕوانم و نازانم لە کوێم
بەڵام / ئەوە باشدەزانم و دڵنیام
هەموو ڕۆژەکانی تەمەنم
لەنێو گەرەکە هەژارنشینەکانی
نێو نیگا نەرمەکان و
خەونە خەماوییەکانی تۆم
من وا لەوێم
وەک موریدێکی ئەشقیای ون
بۆ تاهەتایە / لەوێدا نیشتەجێم

٢
هۆ پەپوولە پاییزییەکە
زەمەن دەڕوا
تەمەن دەڕوا
تۆش لە من دوورتر دەکەوییەوە
دوور دوور دوور
دوور / وەک مەوداکانی نێوان
ژیان و نیشتیمان ..............ی....... من
خۆرەتاو و خەونەکان ...........ی....... من
ئاگر و ئەوینەکان ...................ی.........من
باران و بەهارەکان..............ی.........من
شەونم و شەوەکان.............ی .......من
تا دێ منیش لە ڕۆحی تۆ نزیکتر دەبمەوە
نزیک نزیک نزیک
نزیک / وەک مەوداکانی نێوان
من و میلۆدییەکانی مردن
من و شەباهەنگەکانی شیعر
من و نیگا نەرم نەرمەکانی تۆ

٣
تۆ / نە ئاگری نە ئاگردان
نە پشکۆکانی خۆرەتاوی نە بورکان
نە کورەی نازییەکانی نە دۆزەخی خوداکان
کەچی / من لەوەتەی هەم لە نێو تۆدا دەسووتێم

٤
وا پێدەچێ
تۆ لە جنسی تریفە بیت
منیش / پێکهاتەیەک بم
لە تۆز و غوبارەکانی تاریکی
یان تۆ / شنەبایەکی فێنکی
نێو هەناسەکانی نیشتیمان بیت و
منیش / ڕەشەبایەکی سەرشێتی
نێو پێدەشتەکانی غەریبی
بۆیە چارەنووس
هێندەی دەکات ناتوانێ
لەژێر ساباتی
کەژوکێوەکانی عەشق
کۆمانبکاتەوە

٥
کاتژمێر چەندی بێدەنگی و
وەرزی چەندەمی نائومێدییە
سەوزایی جەستەی ژیانی بەسەرشانی داداوەو
بەرەو گۆڕستانی دەبات
دەریاش دەروازەی خۆی
بەسەر ڕووی شەپۆلەکان داخستووە
درەختەکان هەر بەچاو
چیرۆکە خەمناکەکان بۆ یەکتری دەگێڕنەوە
من و تۆش لەنێو کتێبەکانی تەنیایی
تاو تاو /
ڕۆژژمێری نەزیفبوونی
ئەم عەشقەمان دەنووسینەوە ...!

تەمووزی ٢٠١٩
ماڵپه‌ڕی ناڵه‌ حه‌سه‌ن