١\٩\٢٠١٨
زەنگیانەی ئاویی.
- رستی
شەشەم -

فەتاح حەسەن
گومان.
گومان لە ئاسایی بونی خۆم دەکەم
چون، خەونەکانم دێنەدی
پێرێ لەخەوما
هەردوو گوێم کەڕ بوو
دوێنێ دەنگم نەبیستی
دوێنێ لەخەوما
بینایی خۆم لەدەست دا
ئەمڕۆ نەمبینیت..
گڕ.
خۆ من روناکیی نیم
گەر روناکیی بام
لێدەگەڕام بمخەیتە ناو گڕ،
ئەی نازانی .. ڕوناکیی
دەستەخوشکی گڕە؟!
دابڕان.
وا هەست دەکەم
تەلاقم لەخۆم کەوتبێ
خۆم لەکوردستان، من لەغەریبیی..
تەڵاقەکە، وا کەوتووە
مەزهەبی عیشقیش،
پێی پینە ناکرێ.
دەریا.
من لە دەریا سەرکەش ترم
شەپۆلەکانی، دەتوانن
یەکتر بخۆنەوە و
لە کەناردا ئارام بگرن،
خەمەکانی من،
نە کەنار دەگرن،
نە مانای هێور بوون دەزانن.
بۆن.
خۆشترین بۆن
نە بۆنی مێخەکە،نە گوڵەباخ
نە بۆنی بارانی پاش وەشتە
نە زوڵفی یار،
خۆشترین بۆن
بۆنی ئارەق وگۆرەوی و
پێڵاوی دایکە..
لە هاوینا.
سەیوان.
(سەیوان) ەکەی من
جێی شەهیدێکی تری
تیانابێتەوە..
سەیوانەکەی تۆش
کچێکی تر.
___________________________________________
*
یەکەم گردی سەیوانە،
دوەمییش مەبەست لە چەترە.
___________________________________________
رستی
ێنجەم:
www.emrro.com/zengiyaneyawiy5.htm
رستی
چوارەم:
www.emrro.com/zengiyaneyawiy4.htm
رستی
سێیەم:
www.emrro.com/zengiyaneyawiy3.htm
رستی
دووەم:
www.emrro.com/zengiyaneyawiy2.htm
رستی یەکەم:
www.emrro.com/zengiyaneyawiy1.htm
دانیمارك
/ ڤالبی -
٢٠١٧
ماڵپەڕی فەتاح حەسەن
|