ئایا نەوشیروان موستەفا دەچێت لە پەڕلەمان دابنیشێت ؟

نیا کامیل    

ئەم دەورەیەى هەڵبژاردنەکانى کوردستان ، پێدەچێت جیاوازبێت لەگەلڕ دەورەکانى پێشووى هەڵبژاردنەکانى چ پەڕلەمان و چ شارەوانیەکانیش ، بەپێى بوونى لیستى جیاواز ، ئەوەى من دەمەوێت بیڵێم وە بۆ من جێگاى پرسیارە ئەوەیە ، ڕابەرى یەکێک لە لیستە مونافسەکانى هەڵبژاردن ، کە پەیامەکەى گۆڕانە ، بەم شیعارە هاتۆتە مەیدان . وە کاندیدى ژمارەیەکى لیستەکەیەتى ، ئەویش وەک ڕۆشنە نەوشیروان موستەفایە . ئایا نەوشیروان موستەفا وەک کاندیدى ژمارەیەکى لیستەکەى دەچێت لە پەڕلەمان دابنیشێت ، یان وەک پەڕلەمانەکەى 1992 کەسێک تەوکیل دەکات .

نەوشیروان موستەفا لە مێژووى خەباتیدا جا بەچى جۆرێک خەباتى کردووە لێگەڕآ ، نەیتوانیوە کەسى یەکەم و ڕابەرى ڕاستەقینەبێت جگە لە شەڕ و بڕیاردانى جەنگ نەبێت ، ئێستاش کە هاتوە خۆى وەک کاندیدى ژمارە یەک پاڵاوتوە ، کە ئەمە تەنها بۆ ڕیکلامى هەڵبژاردنە ، من باوەڕناکەم ئاکام بچێتە پەڕلەمان و کورسیەک بەناوى ئەوەوە هەبێت لە پەڕلەماندا ، بەڵکە خۆبەزلزانى ئەو ڕێگە بەمەنادات ، لەلایەک و لەلایەکى ترەوە ، ئەم کارەش لەو کاتەوە فێربووە کە چ لە دەورانى پێشووى لە سەرکردایەتى یەکێتیدا و ، کەبە تەنها حکومەتیان هەبوو ، چ لە دەورانى حکومەتى هاوبەش لەگەلڕ پارتیدا ، لە سەرۆکایەتى هەرێمەوە تا کارو بارى وەزارەتخانەکانیان ئەنجومەنێکى بچوککراوەیان بۆ پێکهێنابوو لە دەرەوەى پەڕلەمان حکومەت و یاسا و ڕساکان ، هەموو بڕیار و قەرارەکان لەم ئەنجومەنەوە دادەبەزى ، یان بابڵێین لە مەکتەب سیاسیەوە . جا ئەو پەڕلەمانتارە کامەبوو کە سەرپێچى دەکرد ، ئەو وەزیرە کامەبوو کە ئیمزاى نەدەکرد ، هەموو ئەوانە دەورى ئەو پرنتەرەیان دەبینى کە تەنها دەتوانن ئەو شتە چاپ بکەن کەلە کۆمپیوتەرەکەوە بۆن ڕەوانە دەکرێت ......... ئەو ئەم تەجروبە یەشى هەیە . بۆیە لەم دەورەیەشدا من گومانم هەیە پێم وانیە لەم کارە لابدات . بەدەلیلێکى تر ئەگەر بیویستایە دەبوو خۆى بۆ پۆستى سەرۆکى هەرێم بپاڵاوتایە ، ڕەنگە ئەم کارەش بەمەبەستێکى تر بکات ئەویش ئەوەیە نایەوێت بچێتە ژێربارى ئەو شتەى کە ئەو بەناوى گۆڕانەوە تەبلیغى بۆدەکات . تا کەسێک نەتوانێت بڵێت هەڵوێستى لەبەرامبەر بە بابەتێکى دیاریکراودا بەوجۆرەبوو . بۆیە بەپێى یاساو دەستور و قانونێک کەهەیە سەرۆک دەتوانێت دەسەڵاتێکى فراوان مومارەسە بکات وە دژى هەموو ئەو بڕیار و یاسایانە بوەستێتەوە و ڕەتیان بکاتەوە کە پەڕلەمان بۆى دەنێرن و پێویستى بە ئیمزالێدانى ئەو هەیە تاببێتە بڕیار و یاسا ،بۆیە باشترین جێگەیەکە بۆ گۆڕان . وەک دەشزانین پۆستى ئەندام پەڕلەمان یەکسان نیە بە پۆستى سەرۆکى هەرێم . کەواتە دەتوانم بڵێم نەوشیروان لە گردەکە دادەنیشێت نەک لە پەڕلەمان .

تا بەوجێگەیەشى کە بەدەست هێنانى تەنها کورسیەکش لەلایەن لیستەکەى ئەمەوە دەگەڕێتەوە چەندە بە زیانى پارتى و تێکدانى تەوازن قواى نێوان پارتى و یەکێتى دەشکێتەوە ، هەموو ئەو دەنگانەى کە کۆى دەکاتەوە سەرەنجام چۆن دەیکاتەوە کۆشى یەکێتى ، لە هەموو دەنگدانێکى پەڕلەماندا ، خزمەتێکى گەورەیە بە بزوتنەوەى ناسیۆنالستى کوردى و لایەنى یەکێتى بەتایەتى . کە ئەم خەمى لە قوڕاو دەرهێنانى داوە بە کۆڵیدا .

نەوشیروان و لیستەکەى هەموو ڕۆژێک پەیامێک بۆ توێژێکى کۆمەڵایەتى دادەبەزێنن ،وەک ئەوەى خەڵکى لەو شتانە بێئاگابن کە جێى بەحسى جەنابیانە ، ئەوە خەڵکى کوردستان نیە لە دنیاى مۆدێرن و مەدەنى بێئاگان ، ئەوە تۆ و ئاغاکانتە لە سەرى ڕەش و قەڵاچوالان دەستان لە کەوان گیرکردوە بەڕووى خەڵکدا و ترستان لە و دنیایە هەیە . سەرجەمى پەیامەکەى لەوەدا کورت دەبێتەوە کە ئەوان پێیان وایە و لە ئایندەدا هەوڵى بۆ دەدەن ، ئیتر ئەو میکانیزمە دیار نیە کە کارى ئەوانە . بەچى جۆرێک فەسادى و گەندەڵى و بەرزکردنەوەى ئاستى گوزەرانى خەڵک چارەسەردەکەن . ڕاستیەکەى ئەوەیە نەوشیروان و پوختەى کۆمپانیاى ووشە و لیستى گۆڕا کارەکەیان ئەوەیە ئەو ئاوە کەڕۆیشتوە بیگەڕێننەوە بۆ ناو جۆگەکە ، ئەوانەى لە دەسەڵاتى یەکێتى و پارتى تۆراون و ئەوان نەیان توانیە خواستەکانیان تێربکەن و ماوەیەکە تار بوون ئەم بیان کاتەوە قەفەسەکە . بۆیە یەکێکیان دەڵێت من سى ساڵە پیاو بۆ یەکێتى دەکوژم ئامادەشم سى ساڵ بۆ نەوشیروانى بکوژم !!.

بێگومان لە ئیدعا و تەبلیغێک کە دەیکەن کۆمەڵێک خەڵکى تر لە خۆیانەوە دەپێچن ، بۆیە پێویستى بەوەهەیە واخۆى بەدور بگرێت کە دووکەڵى جگەرەى یەکێتى نەیگاتآ ، بەڵام ئەم کارە بۆ خەڵکى ووشیارى کوردستان بەقەد بازدانى کێچێک لە ڕاستى ڕابردووى ئەم بەڕێزە و هاوکارەکانى دوورمان ناخاتەوە . بۆیە ئێستا بەخەڵکى کوردستان دەڵێت دەزانن حکومەت گەندەڵە ، حیزب وەک ئەو کرمەى لێهاتوە کە لە ناوەوە خەریکى کلۆر کردنى بەژنى کۆمەڵگایە تا وشکى بکات ، دیموکراسى و ئازادى و هەڵسوڕانى سیاسى لە نزمترین ئاستیدایە یان هەر نیە . مێژوویەکى دوور نیە تۆ بە بەشێک لە خەڵکى کوردستانت ووت ئاو و کارەبا هى خۆمانە و نایدەین بەئێوە ، خەڵکى کوردستان هەزوو ئێوەى ناونا فیرعەونەکان . ئیتر پێویست ناکات لە تیۆرە شڕۆڵەکانى خۆت کراسێکى پان پۆڕ دادرووى و بە گوڵى ورد و ڕەنگاوڕەنگ بیڕازاێنیتەوە و پێمان بڵێى بۆنیان بکەن .

بۆیە ناتوانى خەڵکى ووشیارى کوردستان بەزۆر لە کۆڵانێکى تەنگەبەرەوە ببەى . لەپاى چى پێمان دەڵێى ئەمەیە پێناسەى حیزب و حکومەت و ئابورى و بازاڕوو ، تەنانەت ئازادى سیاسى و ڕادەربڕین...... بیرتە کاتێک تۆ بەناو لە یەکێتى هاتیتە دەرەوە ئەم باسانە لە گۆڕآ نەبوون ، خاڵى یەکەمى ناڕەزایى و ڕقى تۆ ئەوەبوو نازانى دارایى یەکێتى کە بەدەستى ماڵى تاڵەبانیە چى لێیەت و بۆ کوآ دەچێت . ئیتر من نازانم بۆ چى و لە پاى چى تورەکەى سواڵى خەڵکى کوردستانت کردۆتە بەیداخى خۆت و کەوتویتە شەکاندنەوەى .ئەوەندەش خۆت بە خاوەن حەق دەزانى کە پێتوایە مافى خۆتە لە ماڵەباواتن مانگانە چەندین ملیۆنت بۆ بێت ، بۆیە ئەم خواستانە پەردەى باوەڕی ئێمە بەرانبەر بەتۆ نا دڕێنێت . تۆ گریمانەى کۆمەڵگایەک دەکەیت کەتیایدا هەموو شتێک پێچەوانەى ئێستایە بە ئاڕاستەى باشە ، هەر بەم پێەش دەتەوێت بیسەلمێنى کە دنیا لە فەلەکى تۆدا دەگۆڕێت ، پاشان بەبآ هیچ هۆیەک قامک بۆئەوە درێژدەکەیت کە ناڕازى و توڕەى لە بەرخوردى حیزب و حکومەت . بەم کارەش دەتەوێت چى ڕابردوتە بیکەیتە تۆزى بەردەم با خالیبونێکى تەواو خاڵى ببیت لە گوناه و هەڵە . بۆیە کوردستان بەو مۆمەى تۆ ڕوناک نابێتەوە شەوەزەنگى تارى یەکێتى و پارتى بە نەخشەى فریوکارانەى تۆ نابێتە ڕۆژى ڕوناک.

nyakamil@hotmail.com