|
١٥\٩\٢٠١٤
بنەبڕکردنی تیرۆر
و داعش کاری چینی کڕێکارە!
سامان کەریم
- "بەریتانیاو
ئەمەریکا هۆکاری هەموو ئەم کارەساتانەن، چونکە جەنگیان دژی عێراق بۆ
ڕوخاندنی سەدام حسین ئەم هەلومەرجەی ئێستای خوڵقاندوە".(بوریس
جونسون- عومدەی لەندەن - دەیلی تەلەگراف).
- "فرەکلتوری،
کوشتنی ناموسی و خەتەنەی ژنان و جێبەجێکردنی یاساکانی شەریعەتی بۆ
هیناوین بۆ سوچی کۆلانەکانی شارەکانی بەریتانیادا".
(سەرۆکی ئەساقیفەی کانتەربەری پێشوو).
- ڕۆژی
هەینی ئەندامانی ناتۆ بڕیاری پیکهێنانی " هیزی وەلامدانەوەی خێرا"یان
دا کە پێکدێت لە چەند هەزار سەربازێک، کە لە ماوەی چەند رۆژێکی کەمدا
بگەنە شوێنی خۆیان. بۆ ڕوبەڕوبونەوەی "هەڕەشە جیهانیەکان"، کە لەوانەیە
ڕیکخراوی " دەولەتی ئیسلامی لە عیراق و شام" بگڕیتەوەو، هەروەها بەگژ
هەڕەشەکانی روسیادا بچێتەوە لە ئۆکرانیادا".
(سی ئێن ئێن ٥.٩.٢٠١٤).
- "ڕوبەڕوبونەوەی
ڕیکخراوی دەولەتی ئیسلامی ناسراو بە " داعش"، نا مومکنە بەبی گٶڕینی "
سیستەمە دیکتاتۆرییە فاشلەکان و مەلەکییە تەقلیدییەکان".
(رامی خوری - بەرێوەبەری پەیمابگای (عسام فارس)
بۆ سیاسەتی گشتی و کاروباری نێونەوەیی لە زانکۆی ئەمەریکی لە لوبنان-
چاوپێکەوتن لە گەل سی ئین ئێن - ٣.٩.٢٠١٤).
- "هەروەها
لێدانی ئەسەدو " داعش" بەرژەوەندییەکی زیاتر دەپێکێت کە ئەویش کۆمەکی
شۆرشگێرە موعتەدیلەکانە لە سوریا. ئەگەر نا ئەوا مەترسیەک هەیە لەوەی
کە ئەم پرۆسەی دژی" دەوڵەتی ئیسلامی"، فرسەتێک دەدات بە سەرۆک ئەسەد کە
ئیمکاناتیکی زیاتر دیاریبکات بۆ شکست پێدانی ئەو بزوتنەوانەی کە
ئەمریکا نەیخستونەتە نێو لیستی تیرۆرەوە.
(ماتیو لیفیت - بەریوەبەری پرۆگرامی ستاین بۆ هەواڵگری و لەنێو بردنی
تیرۆر لە پەیمانگای واشتنۆن).
٤-٥ی سێبتمبەر و لەکۆبونەوەکانی ناتۆ لە وێلز سەرانی ئەم هاوپەیمانییە
سەربازییە بە سەرۆکایەتی ئەمەریکا جارێکی دیکە ئەمەریکایان وەک رابەری
خۆیان بە دونیا ناساندەوە. ئەمجارە ئەمەریکا بەفەوری پیویستی بە
ووڵاتانی ڕۆژئاوایە پیداویستی ئەمەریکا بۆ ئەوان لەگەڵ پیویستی ئەوان
بۆ ئەمەریکا بەراورد ناکرێت. ئەمەریکا ترسی دابڕانی ئەوروپای لێنیشتوە،
ئەمە گەورەترین مەترسیەکە کە ئەمەریکا لە ماوەی ٢٤سااڵی ڕابوردودا ترسی
هەیە لێی. هەڵبەتە ووڵاتانی ڕۆژئاواش پێویستیان بە ئەمەریکا هەیە بۆ
ڕیکخستنەوەی ریزەکانی خۆیان سەرەرای ململانیێ نێوانیان بەتایبەت
ئەلەمانیا لەبەرانبەر ئەمەریکادا.... بەلام مەسەلەی سەیرو سەمەرە
ئەوەیە کە ئەنجامی ئەم کۆبونەوانەی ناتۆ بە ڕاگەیاندنی هاوپەیمانییەکی
جیهانی کۆتای هات دژ بە " داعش"!! واقعەن جیگای پرسیارە. بەلام میدیای
ئەمڕۆ ئەرکی ئەوەیە کە وەلامی هیچ پرسیاریک نەهێلێتەوە کۆمەڵگای بەشەری
بێهوش بکات کە لە ڕاستی دا ئەمکارەی زۆر باش ئەنجام داوە. ئەگەر ئاین
ئەفیون بێت کە ئەمڕۆ ئەوە ناتەواوە بۆ ئاین ڕاستییەکی ئایین قەسابخانەی
کۆمەڵگایە، ئەوا میدیای ئەمرۆ موخەدەراتی تێکەڵە کە ترسناکترین جۆری
موخەدەراتە.
"داعش" ئەو ناونیشانە یان ئەو بیانوەیە کە ئەمەریکا دەیەوێت بەهٶیەوە
هاوپەیمانی جیهانی ڕابگەیەنێت و فشار بخاتە سەر وولاتانی ئەوروپاو
هاوپەیمانەکانی دیکەی لە ڕۆژهەلاتی ناوەراست وەک تورکیاو سعودیەو
ئەردەن و ئیمارات .... ئەوانیش پیویستیان بە "علوجێکی" وەک " داعشە" بۆ
ئەوەی ئەمەریکا بکەنەوە بە ڕابەری خۆیان وەک پیداویستییەکی ئەمرٶی
جیهانی سەرمایەداری نیشانی بدەن و لایەنی کەم وەک سەرکردەی نوینەرانی
سەرمایەی رۆژئاوا لەم هەلومەرج و قۆناغەدا جیی بخەنەوە.
"داعش" بەڵام هیزێکی هیجگار بچووک، وە لە کەمترین پێگەی کۆمەڵایەتی
بەهرەمەندە. هیزیکی بچووکی تیرۆریست نە چەکی ئەتۆمی هەیە، نە رۆکێتی
بالیستی هەیە، نە پەلاماری ئەمەریکا یان ئەوروپای داوە تا ئێستا،
تەنانەت گرتنی موسل وشارو شارۆچکەکانی دیکەی عێراق بە بێ هاوکاری بەعس
و عەشائیرە عەرەبەکان و پرۆژەیەکی سیاسی ئیقلیمی مومکن نەدەبوو. هێزێکی
ئاوەها بچوک بۆچی دەکریتە هۆکاری پێکهێنانی هاوپەیمانییەکی جیهانی؟!
لەحەقیقەتدا داعش یان بۆ لەناو بردنی داعش ئەم هەرا گەورەی دەوێت؟!
نەخیر هیچ پیویست نییە. ئەگەر ئەمەریکا بە راستی بیەوێت داعش لە ناو
بەرێت پێم وابیت یەک هەفتەی بەسە. داعشیک کە لە لەوەرگای خۆیان ئالیکی
خواردوە، کە لە دەزگا موخابەراتیو هەوڵگرییەکانی تورکیاو قەتەر
فیرکراون و ڕاهێنانیان پێکراوە بەسەرپەرشتی راستەوخۆۆ ناراستەوخۆی
ئەمەریکا وهەروەها داعش شاری بەدەستەوەیە و نەوت دەفرۆشێت بە ئاشکرا ،
داعش دەیان و بگرە سەدان بارەگاو دامودەزگاو سەربازگای ئاشکرای هەیە..
بەجیا لە هەموو ئەمانە سەرچاوەکانی مالی داعش ئاشکرایە، ڕۆشنە کام
ووڵاتە لە پشت ئەم هێزە تیرۆریستەوەیە، ئەوەش ئاشکرایە کە کێن ئەو
کەسانەی کە کۆمەک وهاوکاری پێدەکەن.... پاشان ئەم هەموو تەکنۆلۆژیا
پێشکەوتوە ئەمنیەی ئەمەریکا بۆچی یە؟! لەمبارەوە مەسعود بارزانی
قسەیەکی واقعی دەکات ئەگەر چی خەڵکی کوردوستانی کردۆتە قوربانی
سیاسەتەکانی خۆی و ئەمەریکا ئەو دەلیت" ئێمە داواتان لێناکەین کە
ڕۆلەکانی خۆتان بنیرن بۆ ئێرە بۆ شەری دژی تیرۆر، باوەرمان بە
تواناکانی هێزی پێشمەرگەو گەلی کوردوستان هەیە بۆ تیکشکاندنی
تیرۆریستەکان. بەلام چەکی تازەمان پیویستە بۆ شەری تیرۆر"(مالپەری
پارتی دیموکراتی کوردوستان).... ئەو ڕاست دەکات بە هێزێکی وەک پیشمەرگە
یان هەر هێزیک کە کەمێک باوەری بە خۆی هەبیت و چەکی گونجاوی پێ بێت
کاری داعش تەواو دەبیت، بەمەرجێک لەلایەن هاوپەیمانانی ئەمەریکاوە
کۆمەک نەکرین!!
بەلام ئەمەریکا پێویستی پێی هەیە و دەبێت داعش گەورە بکرێت و فوی
تێبکریت و تەواوی میدیای ئەمەریکی و رۆژئاواو عێراقی و وولاتانی
ناوچەکە بۆ ئەم سیاسەتە بۆ ئەم فوتێکردنە ئامادەبکرێت. ئەم ماستە بێ
موو نییە!!
هاوپەیمانییەکی جیهانی پیداویستیەکی فەوری ئەمەریکا و رۆژئاوایە.
مەسەلەو ناوەرۆکی سەرەکی هاوپەیمانی جیهانی نییە بەرانبەر بە داعش
بەلکو لە بناغەوە ئەمەریکا پیویستی بە هاوپەیمانییەکی لەم چەشنەیە و "
داعش"ئ کردۆتە بیانوو. جیگاو ڕێگای جیهانی ئەمەریکا لەساڵی ٢٠٠٨ەوە بە
شیوەیەکی بەرچاو هێواش هیواش ڕوو لە خوارە لە ئەنجامی فەشەلی
سیاسەتەکانی لە پەیوەند بە مەسەلەی ئیسرئیل-فەلەستینەوە، فەشەلی لە
ئەفغانستان و لە عێراقدا، دواتر لە میسر بە روخانی ئیخوان ئەلموسلمین و
لە سوریا بە مانەوەی ئەسەد، دواجاریش لە ئۆکرانیا ... مەسەلەی سەرەکی
ڕۆل و هەیبەت و پێگەی جیهانی ئەمەریکایە کە زۆر هاتۆتە خوارەوە و
لەبەرانبەریدا چەندین زلهیزی جیهانی پەیدابوون و بەشیوەی جۆراوجۆر
ململانی و کێبەرکیی لەگەڵ دەکەن و داوای پێگەی هاوبەش دەکەن لە ئاستی
جیهانی دا یان پیگەی ئەمەریکا و دامو دەزگاکانی کە ئەو سەرپەرشتی دەکات
لە بانک و سندوقی پولی نیونەتەوەییەوە بگرە تا دەگاتە ڕیکخراوی
بازرگانی جیهانی قبولی ناکەن بەم شیوەیە مامەڵە بکەن... وڕێكخراوی
هاوتای ئەوانەیان پیکهێناوە، ڕوسیا و چین و ووڵاتان بریکس، هەروەها
یەکێتی کومرگی وولاتانی کۆنی حەوزەی یەکێتی سۆڤیەت، ڕیکخراوی هاوکاری
شەنگەهای ... پەلهاویشتنی چین لە باری ئابورییەوە بۆ هەموو دونیا و
کاریگەری ئەم غۆلە ئابورییە لەسەر کۆی ئابوری جیهان و بەتایبەت
ئەمەریکا، ئەمە بەجیا لەوەی کە ترس لە چین هەیە وەک هێزێکی سەربازی و
بەکارهێنانی ئەم چنگە سەربازییەی دژ بە هاوپەیمانانی ئەمەریکا لە
ناوچەی باسفیک، پەلهاویشتنی روسیاو گرتن ولکاندنی " قرم" .... ترسی
وولاتانی بەلتیق کە هاوپەیمانی ئەمریکان لە روسیا ... دابەزینی متمانە
بە ئەمەریکا وەک زل‌هیزێک کە هاوپەیمانەکانی بپاریزیت سعودیەو ئیمارات
نمونەیەکن ... هەموو ئەمانە لە نیو جەرگەی ئەزمەیەکی ئابوری قوڵی
جیهانیدا دەچێتە پێشەوە، کە تائێستا سەرەرای زیاتر هەژارکردنی چینی
کرێکارو فراوانکردنەوەی دامینی بێکاری و هەڵگیرسانی چەندین جەنگ
ئومێدێکی رۆشن و واقیعی بۆ چارەسەری نابینرێت لەلایەن بورژوایی
جیهانییەوە...ئەمە بەجیا لەوەی کە ئەمەریکا بەشێوەیەکی ڕاستەوخۆ
تاوانبار دەکریت کە کۆمەک بە تیرۆریستان دەکات لە سوریاو لیبیاو سومال
و...
ئەگەر بۆشی باوک دوای جەنگی یەکەمی کەنداوی ئەمەریکا ووتی " چیمان ووت
دەبێت بڕوات" بەلام ئەوکات ئەمەریکا لەهەوڵی جیبەجێکردنی ئیستراتیژی
جیهانی خۆی دابوو بەڕابەری خۆی ئێستا ئەمەریکا ئەوانی دیکەش هاوبەش
دەکات، هاوبەشیان دەکات نەک شەریک بەلام دیسان بۆی ناچێتە سەرو ناڕوات.
ئەمەریکا دوایی فەشەلی ئیستراتیژی جیهانی "سیستەمی نوێی جیهانی
بەڕابەری خۆی" ئەمرۆ ترسی گەورەی لەسەرە کە سەرکردایەتی رۆژئاوا
بدۆڕێنێت و هاوپەیمانەکانی خۆی لە ناوچە جیاجیاکانی جیهان لە دەست بدات.
هاوپەیمانی ئەمجارە کە لەژیر ناوی " هاوپەیمانی دژی داعش" پیادەی دەکات،
کۆکردنەوەی جاریکی تری وولاتانی رۆژئاوایە بەدەوری خۆیدا" ئەمەریکا' بۆ
ئەوەی رۆژئاوا لە دەست نەدات و " ناتۆ" ش بژیەنیەتەوە، چونکە بێ ئەوەی
بتوانیت ئەو کارە مسۆگەر بکات ئەوا مانایەک نامێنیت بۆ ڕابەری ئەو، چی
دیکە هاوپەیمانانی ناوچە جیاوازەکان متمانەیان پێ نامینیت.
بۆ ئەم مەسەلەیە بۆ ئەم هاوپەیمانییە ناوی داعش هاتوە بەلام هاوپەیمانی
جیهانی وا گەورە دەبیتە گالتەجاری ئەگەر ئامانجەکەی "داعش" بیت، هەموو
ئەوە دەزانن. بۆیە هاوپەیمانی ئێستا بەرانبەر بە وولاتانی زلهێزی دیکەی
جیهانە و بەتایبەت روسیا، لەمبارەوە مەسەلەی ئۆکرانیای کردۆتە بیانوی
کۆکردنەوەی وولاتانی ئەوروپا بە دەوری خۆیدا، هەروەها بریاری دواین
کۆبونەوەی ناتۆ لە ویلز بەشیوەیەکی ڕۆشن ئەم ڕاستییە دەسەلمینیت: (ڕۆژی
هەینی ئەندامانی ناتۆ بڕیاری پیکهێنانی " هیزی وەلامدانەوەی خێرا"یان
دا کە پێکدێت لە چەند هەزار سەربازێک، کە لە ماوەی چەند رۆژێکی کەمدا
بگەنە شوێنی خۆیان. بۆ ڕوبەڕوبونەوەی "هەڕەشە جیهانیەکان"، کە لەوانەیە
ڕیکخراوی " دەولەتی ئیسلامی لە عیراق و شام" بگڕیتەوەو، هەروەها بەگژ
هەڕەشەکانی روسیادا بچێتەوە لە ئۆکرانیادا"(سی ئێن ئێن ٥.٩.٢٠١٤). سەیر
ئەوەیە شوێنی ئەو هیزە کە وەلامی دەست وبرد دەداتەوە بە هەڕەشەکان لە
ئەوروپای رۆژهەلات دەبیت... رۆشنە کە هاوپەیمانی دژ بە ڕوسیایە نەک "
داعش"... داعش بۆتە بیانو.
ئەم هاوپەیمانییە بە شیوەیەکی رۆشن دیارە، ئیران و سوریا و روسیای تێدا
نییە، بونی عێراق واتە حکومەتی عیراق ناچارییە... واتە ناکرێت داعش لە
عێراق و لە سوریا دەسەلاتی هەیە.. حکومەتی سوریا رەفز کراوە، ناکریت
حکومەتی عێراقیش رەفز بکریت، ئەوکات هیچ مانایەکی پڕوپاگەندەشی نەدەما...
لە ڕوانگەی بورژواییەوە ئەگەر بتەوێت لە م شیوەیە لە تیرۆر بدەیت واتە
شیوەی داعش و قاعیدە بەبێ بوونی ئیران وە روسیا وە سوریا مومکن نییە...
ئەمریکا دەیەویت لە ڕیگای ئەم هاوپەیمانییەوە... دۆستەکانی خۆی لە
سعودیە و ئیمارات و بەهیز بکات بەرانبەر بە ئێران.. دەیەوێت حکومەتی
سوریا لاواز بکات لە بەرانبەر تیرۆریستەکانی دۆستی خۆی وەک بەری
ئیسلامی سوریاو سوپای ئازاد!! یان ئەگەر ئەسەد رازی بێت دەست بەرداری
ئێران بێت یان ئەگەر بە هەڵەش بێت چەند موشەکیکی بەردەکەویت بەتایبەت
ئەگەر ئەو کارەی بۆ بچێتە سەر کە دەیەوێت واتە بوردومانی "داعش لە
سوریا". دەیەوێت حکومەتی عێراقیش دەستەمۆ بکات و " سوننە تائیفیەکان"
بە هیز بکات بە شیوەیەک ئەگەر لە ئیران دور نەکەوێتەوە ئەوا حکومەتیک
بیت هاوسەنگی نێوان بەرژەوەندی " ئەمەریکاو ئیران" بە هەمان شێوەی
یەکتر ڕابگرێت...ئەمە مەسەلەی داعش و هاوپەیمانییە بەرانبەر بە داعش
ئەوەندەی بگەرێتەوە بۆ عێراق و سوریا.
بەکورتی ئەمەریکا وهاوپەیمانانی بەهۆی داعشەوە دەیانەویت، حکومەتی
ئێستای سوریا لاوازبکەن و ئەگەر بکرێت بیڕوخینن و حکومەتی عێراق بخەنە
پاڵ خۆیان و لە ئیران دوری بخەنەوە.. لە هەمان کاتدا ئەم سیاسەتە لە
لوبنان بەهۆی فەرەنساو سعودیەوە دەرواتە پێشەوە بۆ لاوازکردنی حزباللە
... ئەمە بە جیا لەوەی داعش هەروەک ئاماژەمان پێکرد جۆکەرەو بۆ زۆر کار
دەخوات... بۆ نمونە ئەگەر پارتی دیموکراتی بارزانی پێ درێژی بکات ئەوا
بە داعش دەیترسێنن و هەرئیستا باسی سەربەخۆییان پێ تەرککردوە، لە کاتی
پێکهێنانی حکومەتی عیراق بە سەرۆکایەتی عەبادی کە مەرجی دانا و پیی
درێژ کرد ئەمەریکا ووتی ئێمە ئیتر کۆمەکتان ناکەین، بۆیە بە پەلە
بروسکێ حکومەتەکەیان پێکهێنا هەر ئەو شەوە...
چی بکریت دژی داعش و دژی تیرۆر.
داعش جۆری زۆرە، لەوانەیە ئەم داعشە علوجەکەیان بیت. مەبەست ئەوەیە
بورژایی ئەوەندە حەقیر و خوێری بوە، هەموو کارێک دەکات بۆ کەلەکەی
سەرمایە بەتایبەت کە لەباری ئایدۆلۆژی و فکرەوە بەتەواوی مایە پوچە بێ
ئەلتەرتاتیڤە، هەروەها لە هیچ بەشێک لە قازانج پەرستی وکەلەکەی زیاتری
سەرمایەکەی خۆش نابێت وهەروا نایخاتە سەر سفرەی خالی کرێکاران. هیچ
سەیر نییە بورژوایی لە داعش تیرۆریست تر وە ترسناکتر بەرهەم بهێنیت،
هەروەک چون داعش بۆڕی قاعیدەی دایەوە. بورژوایی ئەم سیاسەتەی پێ باشترە
لە وەی کە بڕیک لە قازانجەکەی بداتە کرێکاران...
چی بکڕیت دژی تیرۆر، هەموو تیرۆریستەکان، هەموو ڕیکخراوەکانیان، ئەمرۆ
سوریا پڕە لە تیرۆریست، عیراق پریەتی، کوردوستان تیایەتی، تەنانەت کار
گەیشتۆتە زۆر بوونی تیرۆریستەکان لە ئەوروپاو ئەمەریکا و ئوستورالیا....چی
بکرێت دژی داعش؟! مەسەلەکە هەر داعش نییە، ئەی قاعیدە بۆ نمونە؟! به
هەرحاڵ داعش نمونەیەکە لە عێراق وکوردوستان، بەلام قاعیدە بە هیزی خۆی
باقییە وا بەشی هندستانی کردوە کە حەتمەن ئەم پەیامەی زەواهری ئەمەریکا
دڵخۆش دەکات، ئەی ئەو هەموو ڕێکخراوە تیرۆرستیانەی کە ئەمەریکاو سعودیە
پێیان دەڵین " موعتەدل" لە بەرەی ئیسلامی سوریا و ڕێکخراوە
جۆراوجۆرەکانی کە پێکهاتوە لێی و لەسەرەتاوە ١١ ڕێکخراوەی تێرۆریستی
بوون و گرنگترینیان ئەمانە بوون: کەتائبی ئەحراری شام، کەتائبی ئەنساری
شام، جەیشی تەوحیدو لوائی شام و کەتیبەی سقوری شام... پاشان چەبهەی
نەسرەو بەیتی مقدس لە میسر ... ئەمە جگە لە ئیسلامی سیاسی وەک
بزوتنەوەیەکی فراوانتر لە ئیخوان موسلمین و سەلەفیەکان بە گشتی هەروەها
تاڵیبان و ئەو بەشەی دیکەی کە خەریکی دەسەلاتدارییە وەکو حەماس و حزب
اللە و عەسائبی حەق لە عێراق...بەهەرحاڵ ژمارەی ڕیکخراوە
تیرۆریستیەکانی ئیسلامی سیاسی هێجگار فراوان بونەتەوە، ئەوە ئەگەر
ئیسلامی سیاسی وەکو بزوتنەوەیەک بورژوایی و ئیسلامی لە باری شیکردنەوەو
ئەبستراکتەوە وەک فەرزێک بە تیرۆریست ناو نەبەین. کەواتە چی بکەین؟
باسی تیرۆرە بەتەنها وەک مەقاشی دەستی بورژایی یان بەشیک لە بورژوایی
یان باسە لە بورژوایی خۆی وەکو چینێک؟! ئەمە مەسەلەیەکی جدی وگرینگە و
تەنانەت لە نیو بزوتنەوەی کۆمۆنیستی دا باس نەهاتۆتە سەر ئەمە بەلکو "
دژی تیرۆر" یان" دژی داعش" !!" بەلام داعش چییە؟! مەسەلەیەکی سەرەکی
نییە لە نیو رەئی گشتی جیهانی و ناوخۆیی و کۆمۆنیستەکانیشی گرتۆتەوە،
کە ئەمە بورژوایی ومیدیاکانی کاری گەورەو ڕۆژانەی لەسەر دەکەن.....
هەربۆیە هەموو بە دەستە جەمعی باسی مقاوەمەت دەکرێت. بۆ نمونە ئەگەر
بەر بە داعش بگیرێت ئەوکات خەڵکی سوریاو عێراق و کوردوستان ئاسودەتر
دەبن و خەتەری تیرۆریان لەسەر نامێنیت؟! پرسیارێکی گرینگە بەلام
تەنانەت بزوتنەوەکەی ئێمەش لە خۆی نەکردوە....
کەواتە مەسەلەی سەرەکی ئەوەنییە کە دانە دانەی خەریکی روخاندن
وتێکشکاندنی ئەو ڕیکخراوە تیرۆریستیانە بیت، ئەو کارە ناکرێت. باسەکە
دروست وەکو، ئاین وایە ، هیچ ساروخێک هیچ کتێب و ئەفکاریک هیچ بیریاریک
ناتوانیت ئاین لە ناو بەریت مەگەر سەرچاوەی مانەوەی ئاین لەناو ببات کە
سەرمایە ودەسەلاتەکەیەتی. کەواتە بۆ بەر گرتن بەتیرۆر بۆ لەناوبردنی
ریکخراوو دەسەڵاتە تیرۆریستە ئیسلامیە بورژواییەکان... مەسەلەکە ئەوەیە
کە ئەو دەسەلاتە بورژواییانە بروخێنیت وە تیکیان بشکینێت کە دەبنە هۆی
سەرهەڵدانی ئەم ریکخراوە تیرۆریستیانە، یان دروستیان دەکەن.. حکومەتێک
ودەسەڵاتێکی تائیفی ئیسلامی لە عێراق لە ئێران لە سعودیە کە کاریان
ئەوەیە کێبەرکی و شەری تایئفی توند بکەنەوە، حەتمەن لە بەرانبەریدا
تیرۆر سەرهەلدەدات... لە کوردوستان پارتی دیموکراتی کوردوستان کە
راستەوخۆ ئاو لە سیاسەت وئیستراتیژی تورکیا وەردەگریت لە ناوچەکەدا
ناتوانێت چەند جارێکی دیکە ٣١ ئاب بە شیوەی جۆراوجۆر دروست نەکات...
مەسەلەکە بۆ هەر هیزێک و ریکخراویکی کۆمۆنیستی ئەوەیە کە خەباتی خۆی لە
بەرانبەر بورژوایی دەسەلاتداری ناوچەکەئ یان وولاتەکەی کە مەیدانی
هەلسورانیەتی فراوانتر بکاتەوە بۆ روخاندنی ئەم دەسەلاتو حکومەتانە،
ئەم هەنگاوانە ڕاستەوخۆ دژ بە تیرۆریشە.. ئەگەر نا هەر رۆژەوە لە
وولاتیک و لە ناوچەیەک تیرۆر وەکو قارچک سەر دەردەهێنیت.... ئەگەر نا
ئەمەریکا و یان هەر وولاتیکی زلهیز دەیان کۆنترای تیرۆریستی ئیسلامیت
بۆ دروست دەکات بەهۆی ئەم دەسەڵات و حکومەتانەوە....
ئەم پراتیکە کۆمۆنیستی یە مانای ئەوەیە لە هەرشوێن و کوچەو گەرەک و
کارگەیەک نفوزی کۆمۆنیزم و سوننەت و شێوەکاری کۆمۆنیستی لە خەبات و
نارەزایەتی کڕێکاران و خەڵكی تەنگ دەست هەروەها سوننەت و ئەخلاقیەتی
کۆمەلایەتی کۆمۆنیستی لە نێو ئەو شوینەدا زال بێت بەهەمان ئاست
مقاوەمەت بەرانبەر تیرۆرو تیرۆریزم وە دەسەلاتی بورژوایی بەهێز دەبیت،
ئەمە ئەرکی سەرەکی و لە هەمانکاتدا فەوری وڕۆژانەو ڕۆتین و ناڕۆتینی
ڕابەرانی کڕیکاری و کۆمۆنیستی یە، بە مانایەکی دیکە ئەمە مانای
بەهێزکردنی مقاوەمەتی سیاسی چینایەتییە دژ بە داعش، بەرگرییە لە مافە
سیاسی و کۆمەلایەتی وفەردییەکانی کڕیکاران وخەڵکی زەحمەتکیش و
ئامادەکردنی چەکدارانەی خەڵکە لەو گەرەکە یان لەو کارگەیە یان لەو
شارۆچکەیە بۆ وەستانەوە نەک بەرانبەر بە داعش بە تەنها بەلکو بەرانبەر
بە گشت تیرۆریزمی بورژوایی ودەسەلاتەکەشی.
لە باری موشاهەدەی واقعێشەوە خەبات دژی تیرۆر و تیکشکاندنی ئەمرۆ بۆ
چینی کریکارو ڕابەرانی و بە تایبەت دوایی پێکهێنانی بەرەیەکی جیهانی دژ
بە داعش.. (سەرنج بدەن دژ بە داعش نەک دژ بە تیرۆر)و بەشداریکردنی
وولاتانی وەک سعودیەو قەتەر وولاتانی خەلیج بە گشتی هەروەها تورکیا بە
شیوەیەکی کەمترو ناراستەوخۆ تر... راستەوخۆ لە دەرەوەئ سیاسەتی
ئەمەریکاو وولاتانی ناوچەکەو هێزە سیاسیە بورژواییەکان دەرواتە پیشەوە
لە لایەک و لە لایەکی ترەوە ، پیکهێنانی ئەم بەرە جیهانییە نیشانەی
ئەوەیە کە بورژوایی یان ئەم میحوەرە لە بورژوایی بە رابەری ئەمریکا
دەیەویت لە ریکخراویکی تیرۆریستی بدات کە ناوی داعشە بەلام کۆرس و
کۆلیچ و خولی تیرۆریستی بۆ تیرۆریستەکانی دۆستی خۆیان بکەنەوە لە
سعودیە بە سەرپەرشتی ئەمەریکا ئەمە گالتە کردنە بە رەئی گشتی و
کلاوکردنە سەری خەڵکە .. کڕیکاران وە رابەرانی کریکاری وە
کۆمۆنیستەکانی سەر بەبزوتنەوەی کریکاری لەو بەرەیەدا نین و ئەرکیانە کە
خەڵک هوشیار بکەنەوە، بەتایبەت کرێکاران و رابەرانی کریکاری هوشیار
بکەنەوە لە بەرانبەر بەرەیەکی واداو ئەو هێزانەی بەشداری تیدا دەکەن،
لەهەمانکاتدا " داعش" هەر تیرۆر ناکات، بەلکو فکرو شیوەکارو
ڕیکخرابونیشە.. پیویستە کۆمۆنیستەکان لەمبارەوە پیشرەو بن لە باری
فکرەوە لە فکری وەهابیەوە بگرە تا سەید قوتب و حەسەن بەنا و مەولودی و
باقر ئەلسەدرو خومەینی... پێویستە بناغە فکرییەکانی لە روانگەی
کۆمۆنیستی یەوە بخرێتە ژیر رەخنەوە... لە باری شیوەکارو پراتیکی
ڕیکخراوەییەوە دژایەتیان لەگەڵ خواست و ویست و ئارەزووی کۆمەڵگای
بەشەریدا رۆشن بکرێتەوە....
ئەم ڕیگایە بۆ چینی کریکار نزیکترین و خێراترین ڕێگایەو لە ڕاستیدا لە
هەلومەرجی ئێستادا ڕیگای تر نییە.... تەنها چینی کڕیکارە کە نەک هیچ
بەرژەوەندییەکی نییە لەگەڵ تیرۆرو ڕێکخراوە تیرۆریستییەکان بەڵکو بونی
ئەوانە راستەوخۆ دەبێتە هۆی مالوێرانی و نەبوونی و ئاوارەیی و داخستنی
کارگەو بیکاری و هەژارییەکی زیاترو دەووبەرەکییەکی زیاترو لەدەستدانی
زیاتری یەکگرتووبونی، وزاڵبونی کۆنەپەرستی و سەرکوتکردنی تەواوی ئازادە
سیاسی و فەردی ومەدەنیەکان ... تا ئەم هیزە واتە هێزی چینایەتی کرێکار
بە دەوری حزبی خۆیدا ڕێکخراو نەکریت یان خۆی ڕێکخراو نەکات لە ناوچە
یان لە شوێنێکدا نەبێتە هێز یان لایەنی کەم هیزێکی نەبیت ، توێژەکانی
دیکەی کۆمەڵگا لە لاوان لە خەڵکی زەحمەتکێش لە ژنان وە لە خەڵکانی
عەلمانی و ڕۆشنبیر خۆیان نادەنە دەست هێزو حزبێک کە هێزی چینایەتی خۆی
ڕێک نەخستوە. هێزێک خۆی وە چینی خۆی ڕێک نەخستبیت، چۆن خەڵکانی دیکەو
توێژەکانی دیکە ڕیشی خۆیانی دەدەنە دەست. بەتایبەتی لەهەلومەرجێکی
کۆنەپەرستی وەک ئەمڕۆی دونیادا. ئەمە تەجروبەی هەموو مێژووی هێزەکانی
بزوتنەوی کۆمۆنیزمی کرێکاریشە لە ماوەی ٢٥ ساڵی ڕابوردودا. خۆ گریمان
هێزیک کۆبوەوە لەبەر هەر هۆیەک یان بەهۆی هەر هەلومەرجێکی سیاسی یەوە
بێت بۆ نمونە هێزێکی شێلگیری "دژی رژێمی" یان هێزێکی شیلگێری دژی "
تیرۆرین" ...ئەم هێزە پاش ماوەیەکی کورت و دوای کۆتایی هاتنی ئەم
هەلومەرجە دەروات و نامێنیت. تەجروبەی مارکس وە لینین لەمبارەوە زۆر
گرینگن.
١٢\٩\٢٠١٤
ماڵپه‌ڕی سامان
کەریم
_________________________________
هەموو بابەتەکان دەربارەی
''داعش'' لێرە ببینە:
www.emrro.com/dosyeydahish.htm
|
