|
١\٩\٢٠١٤
"داعش" ئیسلامی
هاوچەرخ وەک نوێنەری سەرمایە و سیاسەتی هەنووکەیی ئەمەریکا!
سامان کەریم
ئەمرٶ ئیتر کە باسی ئیسلام دێت،بەتەنها باس نیە لە بڕوایەکی ئایینی کە
نەوە بەنەوە ماوەتەوەو لەگەڵ خۆیدا کۆمەلێک کالچەری جێخستوە وەک نوێژ،
حەج و رۆژوو بێرێزی بەژن و دیاریکردنی جیگاو ڕێگایان وەک ئینسانێکی کەم
عەقڵ، بێڕێزی بە ئینسانە بچوکەکان" مندالان"... وە بەتەنها باس نییە
لەوەی کە ئایینی ئیسلام وەک هەموو ئاینەکانی دیکە وەک پێداویستیەکی
سەرمایە جێکەوتوە لە ئاستی جیهانیدا.... باسی ئەمڕۆی ئاینی ئیسلام باسی
ئیسلامی هاوچەرخە، باسی داعش و ئایدۆلۆجیای ئیسلامی داعشە.
باسی جێخستنی ئەلگۆیەکە لە دەسەڵات لە وەحشیگەری و بەربەریەت لە شیوازی
کارو عادەتی خۆتەقاندنەوەو و سەربڕینی ئینسان و ناو سک خواردنی
ئینسانەکان... ئەم بەربەریەتە بەربەریەتی سەرمایەیە لەبەرگی ئاییندا،
ئەم وەحشیگەرییە پیداویستی ئەمرۆی بورژوایی جیهانییە وەک چینێک لە
هەلومەرجی ڕاگوزەری جیهانی ئەمرۆی سەرمایەدا، پێداویستییەک بەهەمان
ئاستی هاتنەمەیدانی ریفۆرمیزمی بورژوایی و ئەلتەرناتیڤی " دەوڵەتی
ریفاه" لە کاتی خۆیدا، پێویستە. کە بورژوایی جیهانی ناچارکرا ریفۆرم
قبوڵ بکات و بزوتنەوەی سوشیال- دیموکراتی وەک بزوتنەوەیەکی دیموکرات و
عەدالەتی کۆمەلایەتی بخاتە پێشەوە، ترس لە بزوتنەوەی کرێکاری و
دەسەلاتی ئەم چینە بوو، مەسەلەکە ئەوەنەبوو کە بورژوایی ریفۆرمی قبولەو
دەیەوێت لەبەشێک قازانجی سەرمایەکەی خۆش بێت بۆ دەوڵەتی ریفاهی
کۆمەلایەتی، بەڵکو بۆ ئەوەی سیسەتەمەکەی ڕابگڕێت ناچآر بوو ئەو سیاسەتە
بگرێتە پیش. داعش بە هەموو کۆنەپەرستی و وەحشیگەری و
بەربەریەتییەکەیەوە پیدوایستی ئەمرۆی سەرمایەیە لە ئاستی جیهانیدا.
بەلام داعشی ئەمڕۆ ئەگەرچی حەقیقەتی ئیسلامە بەلام پەیوەندی بە
ئیسلامییەکانی پێش خۆیەوە نییە. ئیسلامی داعشی کوری ئەمڕۆیە، هەورەک
چۆن ئیسلامی " محمد"ئ سەردەمی فتوحاتی یەکەم ئیسلامی سەردەمی خۆی بوو.
داعش حەقیقەتی ئیسلام و باسی ئیسلامێکە کە بەتەواوی لغاوی بەردراوە،
باسی ئیسلامیکە کە دروست ئیسلامئ "محمد"ی سەردەمی سەرهەلدانی ئیسلامە
لەباری ئایدۆلۆجی و باوەڕەوە، شیوازی کارو وتەنانەت شێوەی بەرێوەبردنی
کاروباری "خەلافەتەوە". وەک بزوتنەوەیەکی سیاسی و ئاینێک باوەڕەکەی
بەتەواوی پشت بەستوە بە "سەلەف" ی سەردەمانی سەرهەڵدانی ئیسلام، بەلام
بە چەکی مۆدیرن و هامەرو ڕۆکیتی ستینگەری ئەمەریکی. باسی ئیسلامێکە کە
تەنانەت ڕەنگو بۆکانی نزیک بەخۆشی قبوڵ نییە، باسی ئیسلاـمیکە دەیەوێت
مۆری خۆی بدات لە ناوچەیەک کە لەباری مێژوویەوە پێش زیاتر لە ١٤٠٠ ساڵ
لەلایەن خەلیفەکانی باپیرە گەورەی " بەغدادیەوە" هێرش کراوەتە سەری و
داگیرکراوەو مۆری " فتوحات" نراوە بە زێدی کلدانی و ئاشورییەکانی ئەم
ناوچانەوە... ئەوکات چەکی دەست شمشیرو ڕم و کەوانە و قەڵغان بوو...
ئەوکات داگیر کاری ئیسلامی سیاسی بوو لە پێناو فراونکردنەوەی ناوچەی
نفوزو دەسەلاتی دەوڵەتی ئیسلامی تازە پێکهاتوی فیوداڵ و کۆیلەداری
بەرانبەر بە ئیمپراتۆریەتەکانی ئەوکات لە وولاتانی " فارس"و " تورک".
ئیسلام وەک بزوتنەوەیەکی سیاسی هەمیشە هەمان پەیامی پێبوە، هەردەم
هەمان شیوەکارو وشیوازی خەباتی هەبوە. ئەوەی داعش دەیکات حەقیقەتی
بزوتنەوەیەکە کە ناتوانیت وا نەبیت و وانەکات مەگەر بنەبڕ بکرێت و
کڕیاری نەمینیت، ئەویش بەندە بە بنەبڕکردنی سەرمایەوە وەک سیستەمێکی
سیاسی-کۆمەلایەتی. بزوتنەوەیەک کە ناتەبایە نەک لە گەڵ خولیاو هیوای
ئینسانەکاندا بەڵکو لە گەڵ زانست و تەکنۆلۆجیاو و گشت ئەو شاکارە
زانستیانەی کەل ماوەی ٢-٣ سەدەی ڕابوردودا کۆمەلگای بەشەری پێی گەیشتوە،
ناتوانیت هارو لغاو بەربوو نەبێت، ناتوانیت تیرۆریست نەبێت، ناتوانیت
مندالان نەکاتە بۆمب و ناتوانیت ژن نەکاتە کەنیزەو سەبایەو نەیفرۆشیت
چونکە لە بناغەوە لە ڕوانگەی ئیسلامەوە ژن کۆیلەی کۆیلەکانە. لە
راستیدا ژن لە ئیسلامدا هەمیشە فرۆشراوە، بەلام کاتێک لغاوی دەگێریت و
پێداویستی سەرمایە بۆ ئەم ئاین و بزوتنەوەیە دەچێتە دواوە، ئەوکات ژن
بە " جملە" و لەبازاردا نافرۆشێت، وەک لە ساڵانی شەستەکان و حەفتاکانی
سەدەی ڕابوردوودا بوە، بەڵکو لە نێو ماڵەکان و لە مزگەوت و لە
حسینیەکاندا دەفرۆشێت" مارەیی" فرۆشتنی ئینسانێکە کە ناونراوە "ژن"،
یان "زەواجی سیغە"....بەلام ئێستا سەرمایە پێویستی پێێەتی بۆیە سەرنج
بدەن، ژن بوە بە مادەیەک بۆ قازانج و سێکس بازی هەم دەفرۆشرێت هەم وەک
کالایەک لە زەتی سێكسی و سودی مەعنەوی لێ وەردەگێرێت، لە ڕێگای "زەواجی
نیکاحەوە" و هەم مامەڵەی سیاسی پێوەدەکرێت.
سەیر ئەوەیە ئەم " شەرەف "سزانە، ئەم بێ ڕێزو خوێن ڕێژو ژن فرۆشانە،
نەک تەنها وەک کالایەک وەک مەڕێک وەک پارچەیەک قوماش وەک بوتڵێک ویسکی
وەک یەک کیلۆ ئەفیون.... مامەڵەی ژن دەکەن بەڵکو لەوە سوک و قێزەونتر،
قەباعەتتر، لەپێشەوە ئیغتسابی " لاقە" دەکەن، لە پێشەوە خۆیان " بێ
شەرەف "دەکەن، بۆ ئەوەی دواتر بتوانن " شەرەف"ی خەڵکانی دیکە هەراج
فرۆش بکەن. ئەوە عادەت و کالچەری بزوتنەوەیەکە، کە خێرو بێری سەرمایەو
سیستەمە هاوچەرخەکەی نەبیت ئێستا تۆزیشی نەدەما.
پێداویستی " داعشیزم" بۆ سەرمایە.
جیهانی ئەمڕۆی سەرمایە لە قەیران وتەنگەژنەیەکی هێجگار هەمەلایەنەو قوڵ
و فراواندایە. لەباری ئابورییەوە دەرگیرە لە گەڵ قەیرانێکی گەورەی
جیهانی وتا ئێستا سەرەرای هەژارکردنی زیاتری چینی کریکار لە ڕیگای
بێکاری و کەمکردنەوەی موچەو هەلکیشانی باج و زێدە باج لەسەریان و
بەرزکردنەوەی تەمەنی خانەنشینی و گرانکردنی پێداویستییەکانی ژیان و
دەیان جەنگ و کاولكاری ، تائێستا ئومێدێک بە چارەسەرکردنی ئەم قەیرانە
نییە. لەباری سیاسییەوە هێزە بورژواییە جیهانیەکان لە بەرانبەر یەکدا
وەستاون تەواوی ووڵاتانی جیهانیان کردۆتە مەیدانی جەنگی سەربازی و
سیاسی و ئابوری هەر ئێستا لە ووڵاتانی یەمەن و لوبنان و صومال و
نیجیریا و مالی و لیبیا و عیراق وفەلەستین-ئیسرائیل و سوریا بەحرەین و
ئەفغانستان و ئۆکرانیاو پاکستان و میسرو سودان جەنگێکی سەخت و
تیرۆریستانە بە وەکالەت بەڕیوە دەچیت، کە لەپشت هەر یەک لەم جەنگانەوە
، ووڵاتانی زلهێزی جیهانی هەیە. ئەمە بەجیا لە کۆسپی گەورەی سەرخانی
سیاسی " حکومەت، بەڕێوەبردنی دەسەڵات، دەستورو یاساکان" هەم لەئاستی
ووڵاتاندا، هەم لەئاستی دامودەزگا جیهانیەکاندا.... ئەم پۆینتە لە
خوارەوە زیاتر ڕۆشن دەبێتەوە.
لەباری ئایدۆلۆژییەوە بورژوایی جیهانی هیچ کات بەم شێوەی ئێستا بێ
ئەڵتەرناتیڤ نەبوە. بورژوایی لە دوای جەنگی دووەمی جیهانەوە دابەش بوو
بە سەر دوو جۆر ئایدۆلۆژیای جیاوازدا بەلام سەر بەیەک خێزانی بورژوایی.
دیموکراتیزم کە بازاری ئازاد و ئازادی فکرو بیروراو هەموو ئەمانەیان
پێوە دەکرد کە ئەمەریکا ڕابەری دەکرد. بەرانبەریش ناسیونال- ریفۆرمیست
کە بە " کۆمۆنیزم" ناساندیان و وایان پروپاگەندە بۆ کرد ... لێرەدا
نەبونی دیموکراتی و ئازادییەکان، سەرمایەداری دەوڵەتی... بەهەرحال
بورژوایی جیهانی سەرەرای ئەوەی کە دابەش بوو بوو بەسەر دوو بەرەدا
بەلام لەباری ئایدۆلۆژی و سەقامگیری فکرییەوە کۆسپێکی وای نەبوو.
دوای ڕوخانی بلۆکی بەرانبەر تا ماوەیەکی زۆر بلوکی سەرکەوتوو هەر لە
بەرانبەر " کۆمۆنیزمی" ڕوخاودا خۆی پێناسە دەکردەوە.. بەلام ئەمە ئیتر
ماوەیەک دەیخوات. هەر زوو پڕسیارێکی گەورە هاتە بەردەم ئەمەریکا ئەویش
ئەوەبوو: دوژمنی بەرانبەر کە هەڵگری ئایدۆلۆژییەک بێت و قابیلی ئەوەبێت
دوژمنایەتی بکرێت کام هێزو کام ووڵات و کام بزوتنەوەیە؟ بورژوایی
جیهانی بەبێ دوژمن ناژیت و ناتوانێت درێژە بە سیستەمەکەی بدات
وبیپارێزێت.... لە دوا لێکدانەوەداو لە ئەرزی واقعدا کە هەموومان
شاهیدین دەگەینە خوڵقاندنی یان وردتر بڵیین زیندوکردنەوەی ئیسلامی
سیاسی وەک بزوتنەوەیەکی ناوچەیی و بگرە جیهانی فراوان. بەڵام ئەم
پڕۆسەیە بۆ بورژوایی جیهانی و لە فکری ئیستراتیژی دا هەر زوو بیری
لێکراوەتەوەو دەگەرێتەوە بۆ سەرەتایی دوژمنایەتی کردنی " کۆمۆنیزم" ی
ئەوکاتی روسیا. لەمبارەوە ئیخوانیەکان لە میسرو فەلەستین سەر قافلەی
پەیوەندی نیوان ئیسلامی سیاسی و ئەمەریکا بوون لە سەرەتای سالانی
پەنجاکانی سەدەی ڕابوردوودا.
دوای ئیسلامی سیاسی قاعیدەیی دەگەینە ، ئیسلامی هاوچەرخ کە ئیسلامی
داعشە وەک تازەترین مۆدێلی تیرۆر. بەلام داعش ڕابەڕو سەرکردەو
نەخشەڕێژی بزوتنەوەیەکی کۆمەلایەتی و گەورەی سیاسی یە، یان وردتربڵێین
" داعش" لە باندێکی تیرۆریستی بچوکەوە کرا بەم ڕابەرەو بەم زلهێزە، وەک
پیداویستییەکی سەرمایە لە هەلومەرجی ئێستای خەباتی چینایەتیدا لە ئاستی
جیهانیدا. بەشێک یان بالێکی گەورەی بوژوایی جیهانی بەڕابەری ئەمەریکا،
گەشەو هەڵدانی ئەم جۆرە لە بزوتنەوەو باندانە" کٶنترا ئیسلامی"، لە
چوارچیوەی ئیستراتیژی قٶناغی ئێستاو هەلومەرجی ئەزمەگرتووی سیاسی و
ئابوری و فەرهەنگی وئایدۆلۆجی سەرمایەدا بە پێویست دەزانن و پێویستیان
پێی هەیە. "بەهاری عەرەبی" بەهاری تاقیکردنەوەی ئەم جۆرە باندو
هێزانەشی گرتە خۆو لەڕاستیدا بەهاری ئیسلامی سیاسی بوو. بەلام سەرەڕای
ئەوە بەهاری عەرەبی دیاردەو بابەتێکی کۆمەلایەتی ڕیشە داکوتاو بەهێزی
نیشاندا لە جیهانی عەرەبدا ئەویش هاتنەمەیدانی چینی کریکارو یەکگرتوویی
ئەو چینە بوو هەرچەند لە ئاستی هەرە نزمیدا بوو، ئەمە بورژوایی جیهانی
و بەتایبەت ئەمەریکی توشی شۆک کرد ... هاتنەمەیدانی کریکارانی میسرو
تونس لە نێو جەرگەی شۆڕشدا سەرەتایی هەلپێچانی ئیستراتیژو نەخشەکانی
ڕۆژئاوا بوو بەرابەری ئەمەریکا، ئەگەرچی چینی کرێکار فەشەلی هێنا لە
وەی کە وەک هێزێکی سیاسی و بە ئەلتەرناتیڤی خۆیەوە بێتە مەیدان بەلام
هیچ لایەن و هێزێک لە دونیادا ناتوانێت ڕۆلی ئەوان لە روخاندنی موبارەک
و زەین ئەلعابدین و لە قولکردنەوەی دامینی داواکارییەکان نەبینێت و
تۆماری نەکات....
ئەمەریکاو ڕۆژئاواو بیریارانی وەکو هینگینتون وفۆکۆیاما و هەزارەها
نوسەرو کۆلکە نوسەر، لە گەڵ ڕوخانی دیواری بەرلین دا چینی کریکاریان لە
گۆر نا و کۆتاییان بە مێژوو هێنا. بەلام لە ئەوروپاو لە چەندین
وولاتانی دونیا لە سالی ٢٠٠٨ەوە هەزارەها مانگرتنو خۆپیشاندانی کریکاری
پراتیک کرا لە وولاتانی میسرو تونس ئەوە کڕیکاران بوون کە کلپەی
شۆڕشیان خۆش کردو ڕۆلی گەورەیان هەبوو... بڕیار بوو بیری ئازادو
یەکخەرو پێشکەوتنخوازو چەمکەکانی وەک چینی کرێکار و ڕابەری کرێکاری
وخەباتی چینایەتی و کۆمۆنیزم و مافە سیاسی و ئابوری و تەنانەت سەندیکای
کڕیکاری.... لە ناو بچن . بورژوایی جیهانی بەهەموو بزوتنەوەو مەکتەبە
فکرییەکانیەوە، هەموو بیریارو ڕۆشنبیرانیەوە، لە دیموکراتیزمی ئەمەریکی
یەوە بگرە تا دەگاتە ئەوروپی تا دەگاتە لیبرال و ریفۆرمیست و تا
ناسیونالسیت و نازی و ئیسلامیەکان بە هموو شیوەو ناوە جیاجیاکانیانەوە...
لە ئەمەریکاوە بگرە تا وولاتانی چین و ماچین لە ئیسلەندەوە بگرە تا
باشوری ئەفەریقا... هەر هەموویان سودمەندن لەوەی کە خەباتی چینایەتی
هێندە بەرنە دواوە کە باسێک لە توانا و هێزی چینایەتی کرێکار نەمێنێت و
ئەمکارە هەر وەک لەسەرەوە ئاماژەیەکمان پێکردوە لە کۆتایی جەنگی
دووهەمەوە دەست پێدەکات و دەچیتە ئیستراتیژی سیاسی وولاتانی ڕۆژئاواوە
بە ڕابەری ئەمەریکا.
بورژوایی جیهانی وناوچەکە دەیەوێت داعش نیشانی کۆمەلگای بەشەری بدات
وەک ئەلتەرناتیڤێک بۆ دەسەڵاتی چینەکەی لە وولاتانی عەرەب نشیندا. ئەمە
دوا پەیامی بورژواییە یان بورژوایی رۆژئاواو ئەمەریکا
وهاوپەیمانەکانیەتی بۆ کۆمەلگای بەشەری. دەیانەویت نیشانی خەڵکی بدەن
وەبەتایبەت چینی کریکاری بدەن کە دەسەڵاتیکی لەم چەشنەش چاوەڕێتە
وئەگەرێکە. ئەم پڕۆژە سیاسی یە لە دوای روخانی ئیخوانەوە لە میسر بوە
تەوەرەی سەرەکی سیاسەتی بورژوایی بالێ ئەمەریکاوهاوپەیمانانی، بۆئەوەی
خەڵک بلێ" رەحمەت لە کفن دز"... وەحشێکت نیشان دەدەن کە پابەند نییە بە
یاساکانی دارستانەوە، بۆ ئەوەی وەحشێک قبول بکەیت کە پابەندە بە
یاساکانەوە.
بورژوایی جیهانی لە قۆناغی ئێستادا هیچ ئەلتەرناتیڤێکی تازەی پێ نییە.
دیموکراتیەت لەو کاتەی کە جەنگی سەرکەوتنی گێرا لە هەمانکاتدا قۆناغی
ئاوا بوونی بوو ئەمە پیش ٢٥ ساڵ لەمەوبەر. بەلام ئێستا پاش ئەوەی کە
دەرکەوت ئەوەی دیموکراتی دەیکات وەکو دەسەڵات وپراتیک و بەرێوەبردنی
دونیا هەر ئەوەیە کە نازییەکان و هیتلەرییەکان کردیان: جەنگ و
داگیرکاری، ئابلوقەی ئابوری ، بە ئاوارەکردنی خەڵک و پاوانکردنی دونیا....
کارو سیاسەتێک کە ئەمەریکاو لە گەڵیدا رۆژئاوا لەدوای روخانی دیواری
بەرلینەوە کردویەتی لەوە زیاتر نییە... ژمارەی کوژراو بریندارەکانیش
لەماوەی ئەم ٢٥ سالەدا لە ژمارەکانی جەنگی جیهانی دووەم زیاترە کەمتر
نییە لە ئاستی جیهانیدا....لە ئاستی ناخۆیی وولاتانی ئەمەریکاو
رۆژئاوادا بەهەمان شیوە دیموکراتیزم وهێزەکانی و دەسەلاتی بورژوایی
دەسەلاتیان لە خزمەت گەورە سەرمایەداراندا بووە ئەو دەستکەوتانەشی کە
لەماوەی یەک سەدەی ڕابوردودا کریکاران بەدەستیان هێنابوو... هێدی هیدی
خەریکن وەریدەگرنەوە لە ژیر ناوی بوحرانی ئابوریدا.... دیموکراتیەت
ئەمرۆ دەیان ملیون کرێکاری لە ئەوروپاو ئەمەریکا بێکارو هەژار کردوە،
دەیان ملیونی دیکەی بێ خانەو لانە کردوە بەتایبەت لە ئەمەریکا... لە
گەڵ ئەوەشدا بورژوایی دەیەوێت فشارەکانی خۆی بۆسەر کۆمەڵگای بەشەری
زیاترو زیاتر بکات و دەوڵەت بەتەواوی لە هەموو ئەرکێک بەرانبەر بە
کۆمەلگا " ئازاد" بکات. ئەم پرۆسەیە لە ئەمەریکا لە تەواوبوندایە و لە
ئەوروپا لە پێشرەویدایە لە وولاتانی دیکەی دونیا بە شیوەی جوراوجۆر
کاری لەسەر دەکرێت وپڕۆسەی " پریڤاتیزەیشن" بە شیوەی جۆراوجۆر دەرواتە
پێشەوە... بورژوایی کاری خۆی دەکات لە فرۆشتنی هەموو دەزگا
خزمەتگوازییەکان وکارگەو زەوییە دەولەتییەکان و بێکارکردنی بە لافاوی
کریکاران لە سایەی هەلومەرجیکدا کە " خوێن وشک نەبوتەوە" لە زۆربەی
وولاتان نەزیفی خوێنە، بەلام پڕۆسەی پریڤاتیزەیشن لە عێراق لە میسر لە
سعودیەو لە ئیمارات و لوبنان و بەریتانیا لە فەرەنسا و ئەلمانیا و
سویدو فنلەند تا دەگاتە بەرازیل و ناوخۆی ئەمەریکا .... بە شیوەیەکی
سیستماتیک دەڕواتە پێش.
بەلام لەباری ئایدۆلوژیەوە بورژوایی مایە پوچە. مایە پوچە بەو مانایەی
دەتوانیت هیزو ئایدۆلوژیایەکی داعشی بەرهەم بهێنێت. مایە پوچە
بەومانایەی کە بورژوایی لە باری فکرەوە بەتەواوی ڕیگرە لە بەردەم گەشەو
هەلدان وچونە پێشەوەی کۆمەلگای بەشەری. بورژوازی دەیەوێت لەگەشەی
تەکنۆلۆژیاو زانستە کان کە خۆی پرۆسێسێکی پیشکەوتوو بەرەوپێشە لە
چوارچیوەی ئەفکاری دواکەوتودا لە قالب بدات بەتەواوی فکرو زانست لێک
جیابکاتەوە کە ئەوە دژایەتی گەورەیە بۆ دەسەلات وفکری بورژوایی لەم
قۆناغەدا. لەم قۆناغەدا کە قۆناغیکی ڕاگوزەری جیهانییە و جیهانی
سەرمایە لە مرۆدا بەمانایەک بێ نیزامە و سیستەمیک نییە کە بورژوایی لە
جیهاندا لەسەری ڕیک کەوتبێت....لە هەلومەرجێکی وەهادا بورژوایی "داعش"
بەرهەم دەهێنیت.. بۆ تێپەراندنی ئەم هەلومەرجە ڕاگوزەرە. بۆ هێنانە
خوارەوەی ئاستی تەوەقوعاتی کریکارو خەلک بەگشتی بەتایبەت لاوان لەئاستی
جیهانیدا، بۆ دورخستنەوەی فکری شۆرشگێرانەو بیری پیشکەونخواز، بۆ
دابەشکردنی کۆمەلگاکانی جیهانی عەرەب و ڕۆژهەلاتی ناوەراست بەسەر ئاین
و تائیفەی ئاییندا و بەم پێیە ڕیگرتنی زیاتر لەبەردەم یەکگرتوبونی
کریکار وەک چینیک...
بەلام هەموو ئەمانە بورژوایی بە شیوەیەکی گشتی لێی سودمەندە، ئەوەی کە
ئەمرۆ "داعش"دەکاتە ئەلگۆیەک بۆ بەشیک لە بورژوایی جیهانی و ناوچەکە
ئەوەیە کە چەکێکی تازەیە... وەحشێکە و پەلامار دەدات، چەکێکی تازەیە بۆ
شکانەوەی بالانسی هێز هاوسەنگی بەقازانجی بەکارهێنەرانی، لەم قۆناغەی
ئەمرۆی جیهاندا کە شەریکی سەخت هەیە لە نیوان ئەمریکاو هاوپەیمانانی
لەگەل روسیاو چین و هاوپەیمانانی بە جۆریک کە وولاتانی ناوچەکەی
دابەشکردوە بەسەر دوو میحوەردا، چەک و مقاشێکە بۆ دووبارە دارشتنەوەی
خەریتەی سیاسی ناوچەکە... ئەم سیحرەی "داعش" وەک چەکیک وەک هێزێکی
تیرۆریستی ئیسلامی تەواو تائیفی.. دەیکاتە خەلافەو دەوڵەت و هەموو
میدیای بورژوایی دونیا جاری بۆ دەدات و گەورەی دەکات... ئەم چەکە لە
عێراقدا بالانسی هێزی شکاندەوە و مالکی دەرپەڕاند و نفوزو دەسەڵاتی
ئیرانی لاواز کرد لە بەرانبەردا نفوزو دەسەڵاتەکانی هاوپەیمانی
ئەمەریکاو ئەمەریکای بەهیزتر کرد لە عێراقدا لایەنی کەم لەم قۆناغەی
ئێستادا ....هیز هاوسەنگیەکی تازەی هێنایە پێشەوە. نەک تەنها لە
عێراقدا بەلکو لە ناوچەکەدا کە چاوەروان دەکریت ئالوگۆری دیکە لە
ووڵاتانی ناوچەکە بێتە پێشەوە..ئەم چەکە تازەیە کاری خۆی کردو هێشتا
بەردەوامە.
بەردەوامە چونکە ئەمەریکا پیویستی بە گەلەکۆمەکێیەکی جیهانی دیکە هەیە
بۆ ئەوەی لایەنی کەم لە ئاستی نێو نەتەوەییدا کەمێک بالانسی هێزی خۆی
سەر بخاتەوە و وەکو هیزێکی ڕابەری دەرجە یەکەمی جیهان دەربکەوێتەوە، لە
لایەکی دیکەوە وەک هێزێکی دژی تیرۆر دەربکەوێت کە لە تیرۆریستەکان
دەدات.. بەتایبەت کە چەند ساڵە لە سوریا بە ئاشکرا کۆمەک و هاریکاری
تیرۆریستەکان دەدات.... داعش چەکێکی نوێیە کە هیز هاوسەنگی گۆری دروست
وەکو بۆمبی ئەتۆمی ئەمریکا دژ بە هیرۆشیما... بەلام بۆمبی ئەتۆمی یەک
بار مەسرەفەو داعش دەکریت چەند بار بەکاربهێنرێت و هەر جارە
ناونیشانێکی هەبێت... دەکڕیت لە عێراق دژی بێت و لە سوریا دژی نەبیت،
دەکرێت لە کوردوستان لە ناوچەی پارتی دژی بیت و لە ناوچەی یەکێتی دژی
نەبیت، دەکرێت لە کوردوستان دژی بیت و لە عێراق دژی نەبیت... دەکرێت
گەورەی بکەیت و فوی تێبکەیت و هێزەکانی بەعس و خێلە عەرەبەکان هەمووی
بکەیتە داعش و بەم پێیە ئەم داعشەی ئیستا بەرهەم بێت و دەکرێت هەموو
ئەو هێزانەی لێبکەیتەوەو ڕووتی بکەیتەوەو بە پەلە بکەیتەوە بە دیوی
سوریادا و لەوێ خەریکی کاری خۆی بێت.... لەوە زیاتر دەکریت ئێرانی پی
سەرگەرم بکەیت یان تەنانەت سعودیە کە کەم پارەی بۆ نەرشتبوون لە
سوریادا. ئەم هیزە بەتەواوی لەسەر خەتە لە چوارچیوەی گشتی لە سایەی
ئیستراتیژی سیاسی ئەمەریکادا دەخولێتەوە سەرەرای تۆپ باران و ڵیدانی
لەلایەن هیزە ئاسمانییەکانی ئەمەریکاوە. خەتی ئەمەریکی بەلام بە
شیوەیەکی ڕاستەوخۆ لە لایەن ووڵاتانی قەتەرو تورکیایەوە کاری لەسەر
دەکرێت و دەبرێت بەڕیوە..... ئەم هەلومەرجە دژایەتییەکی قولی دونیای
ئەمرۆ نیشان دەدات. بەلام دژایەتییەک کە واقعی یە، واقعی فەشەلی
ئەمەریکا لە ناوجەکدا لە عێراق لە ئەفغانستان لە سوریا و لە میسر و بە
جۆریک هەوڵدان بۆ بینینی رۆلێکی کەمتر لە ناوچەکەداو زیاتر ڕوکردنە
ناوچەی باسفیک و چین .... دژایەتییەک کە ئۆباما بە ڕۆشنی ئاماژەی
پیدەکات و دەلیت" تا ئێستا ئێمە ئیستراتیژیمان نییە بە رانبەر بە داعش"....
هەر لەسەرەتاوە ئەوە رۆشن بوو ئەمەریکا دەیویست خۆی لەم جەنگە بپارێزێت،
پاشان کە " داعش" لە کۆمپانیاکانی ئەمەریکا نزیک بوەوە لە هەولیر
سیاسەتی ئەمەریکا بو بەوەی کە ڕیگە دەگرێت بگەنە هەولیر نایەوێت داعش
تێک بشکینێت بەلکو تەنها پێشی پێ دەگرێت و پاشآن کە " فولی" سەربردڕا
ئینجا سیاسەت گۆردراو ئیستا دەیەویت داعش تیک بشکێت وتەنانەت باسە لە "
هاوپەیمانی لەگەل سوریا' ئەمە وێرای ئەوەی لە هەوڵدایە بۆ پێکهێنانی
هاوپەیمانی نیو نەتەوەیی دژی "داعش"... لیرەدا دیسان دەرگیرە لەگەل
دژایەتی دا ئەویش وەستانەوە بەرانبەر بە " داعش" بەشیوەیەکی ناراستەوخۆ
وەستانەوەیە دژ بە وولاتانی هاوپەیمانی.. بەلام ئیستا هەروەک باسمان
کرد داعش کارێکی خۆی لە عیراقدا ئەنجامداوە و بالانسی هێزی گۆریوە بە
قازانجی هاوپەیمانانی ئەمەریکا لە ناوچەکەدا.... دەبێت داعش گەورەو
گەورەتر بکرێت.
هاتنەوەی ئەمەریکا، هەوڵدان بۆ داڕشتنی ئیستراتیژی!
لە دوا لیکدانەوەدا دەگەینە ئەوەی ئەمەریکا لە دواین دژایەتی و
پەلەقاژەکانی خۆیدا دەژی... نە دەتوانێت ڕابەڕێکی بێ بەرابەری جیهانی
ئەمرۆی سەرمایە بێت وەک قۆناغی ١٩٩٠-٢٠٠٨... نە دەیەوێت بە ئاسانی دەست
بەرداری ئەو پێگە جیهانیە بێت و شەریک قبوڵ بکات بۆ خۆی لە ئاستی
جیهانیدا، مەبەست لە شەریکی بەرابەرە نەک شەریک بە مانای بەشێکی
نابەرابەری هەبێت. ئە مە کۆسپی دونیای ئەمرۆیە کە کۆمەلگای بەشەری
گیرۆدە کردوە پێوە. هەولێک کە ئیستا ئەمەریکا و هاوپەیمانانی و میدیا
بە گشتی بینیویەتی ئەوە بوە.. کە داعش زۆر فووی تێبکریت و تا بکریت
گەورە بکریت، داعشێک کە ئیستا هەیە لە عێراقدا ناوەرۆکەکەی بەعسیەکان و
خێلە عەرەبیەکانە، بەلام تەنانەت بۆ ئەوەی سیاسەتەکە کورت نەهێنیت
بەعسیەکان بێدەنگ کراون و تەنانەت لە ڕاگەیاندنی ژورنالستی کەوتون،
بەلام لە بەغدا لە مفاوەزاتی پیکهێنانی حکومەتدا داوای لە ٤٠%ی گشت
پۆستەکان دەکەن کە ئەمە یەکەمجارە لە دوای سالی ٢٠٠٣وە داواکارییەکی
لەمجۆرە لە لایەن " سوننە".کانەوە پێشنیار بکریت، خێرو بەرەکەتی داعشە..
داعش گەورەکراوە بۆ ئەوەی ئەمەریکا بتوانێ ئیدعای ئەوە بکات کە
هاوپەیمانیەکی جیهانی پیک دەهێنیت دژی، یان ڕوبەڕوبونەوەی داعش
هاوپەیمانی جیهانی پێویستە. هاوپەیمانی جیهانی دژ بە داعش سیاسەتێکە
ئەمەریکا دەیەویت جاریکی تر بێتەوە ناوچەکە، جاڕیکی تر لەوە گرینگتر
وەک هێزی یەکەمی دونیا خۆی نمایش بکاتەوە و بتوانیت ئیدعای دژ بە تیرۆر
بکات ... من پێم وایە بەشداریکردن لەم هاو پەیمانیەتیەدا کە ئێستا
ئەمەریکا لە هەوڵی ڕێکخستنی دایە ، هیچی جیاواز نییە لە
هاوپەیمانیەتەکەی ٢٠٠٣ و جەنگی یەکەمی کەنداو.... ناوەرۆکی سیاسەت
هەمان کاکڵە بەلام هەلومەرجەکە زیاتر بەزەرەری ئەمەریکا گۆردراوە.
بەشداری کردن لە جەنگی دژی تیرۆر کە ئەمەریکا ڕابەری بکات، هەمان
سیاسەتی کۆمەککردن و هاریکاری کردنە بە تیرۆرو تیرۆریزمی جیهانی و
ئەمجارەیان لە ریگای تیرۆریزمی دەولەتیەوە... ئەمەریکاو هاوپەیمانانی
تیرۆرمان بۆ دەڕوێنن بۆ ئەوەی دوای بیبڕنەوە و دروێنەی کەن نەک
هەڵیکێشن، بۆ ئەوەی سیاسەتی خۆیانی پێ بەرنە پێشەوە. وتەکانی وەزیری
دەرەوەی پێشووی ئەمەریکا مەدام کلینتون لەسەر ڕێکخراوی ئەلقاعیدەی
تیرۆریست بە ڕۆشنی ئەوە نیشان دەدات کە چۆن خۆیان نەخشەیان بۆ
پێکهێنانی کێشآوە وەکو کۆنتراکانی ئەمەریکای باشور.
ئەگەر مەسەلەکە داعشە کارێکی ئاسانە. هەموو مقەرو بارەگاکانی داعش لە
رەقەی سوریاو موصلی عێراق ئاشکرایە، سەرچاوەکانی مالی ئەم هێزە
ئاشکرایە، ئەو دەوڵەتانەی کە کۆمەکی دەکەن زۆر ئاشکرایە...تەنانەت ئەو
کەسایەتیانەی کە کۆمەکی دەکەن زۆر ئاشکران... بۆ ئەمەریکا هاوپیمانانی
تەنها یەک هەفتە بەسە ئەم ڕیکخراوەیە ئێسک و بروسکی نەمێنیت، بەلام بە
ئاشکرا درۆ دەکەن، نیفاق دەکەن، خەڵک گێل دەکەن. ئەمە وێرای ئەوەی لە
کاتێکدا کە باس لە ڵیدانی داعش دەکەن، " بەرەی ئیسلامی لە شام " بە هێز
دەکەن کە بەهەمان ئاستی داعش تیرۆریستن. ئەمەریکا لێدانی داعشی دەوێت
بۆ ئەوەی بە ئارەزووی خۆی ناوچەکە دابەش بکاتەوە ، بۆ ئەوەی
هاوپەیمانانی خۆی لە ناوچەکەدا بە هیز بکاتەوە، بۆ ئەوەی شەری خۆی لە
گەڵ ڕوسیاو چین لەم ڕیگایەوە درێژە پێبدات و نفوزو دەسەلاتیان لە
ناوچەکەدا کەم بکاتەوە.
٣١\٨\٢٠١٤
ماڵپه‌ڕی سامان
کەریم
_________________________________
هەموو بابەتەکان دەربارەی
''داعش'' لێرە ببینە:
www.emrro.com/dosyeydahish.htm
|
