|
|
|
1 ڕێگاى چاوت کانى چاوم ئەشڵەقێنێ جامێ مەیم بۆپڕئەکا لە ئەسرین و یا هەمووم پێ ئەنۆشێ یا لەناوبا ئەمهەژێنێ.
2 لە سەفەرى ئەم جارەمدا بڕیار ئەدەم پڕڕاو پڕپریاسکەکەم مووروى جوان و ملوانکەى ڕەنگاو ڕەنگ ببینم تا بەبیانووى ئەوانەوە بۆساتێک بێ باڵندەى حەزە شێتەکەم لە سینەتا بخەوێنم.
وەرن بۆ غەزاى کوشتنى تاریکى... وەرن بۆ کۆکردنەوەى وردە تەرمى یەڵدا، ئێمە لەوێوە هاتوینەوە، لەو شوێنەى لەناو کتێب و فەرمودەکانى "نور"دا، روناکى حەڵاڵ و تاریکى حەرامە..... لەو شوێنەى لەناو بیرەوەرى مانگدا، شەڕى تار، شەڕێکى ئەزەلییە... وەرن بۆ غەزاى کوشتنى تاریکى.. ئەوەى بێت ... حەفتاو چوار ئەستێرەى کەنیزەک و سەدان چراى باڵا ژن ، حەفتاو چوار مانگى کەلەپچەو سەدان مۆمە کچى بەرز بەژن ، بەدیارى بۆ خۆتان دەبەنەوە..... وەرن بۆ غەزاى کوشتنى تاریکى، ئەگەر بێن لەگەڵ کوشتنى هەر بستێک لە تاریکى فرسەخێک لە جەهل دەمرێت، وەرن با تاریکى بکوژین، وەرن با شەو لە کات و کات لە تاریکى و یەڵدا لە پایز و پایزییش لە مێژوو ببڕینەوە، وەرن با شەو بەو هەموو ئەفسانە درۆزنەو بەو هەموو حیکایەتە چەپەڵەوە سەرەنگون بکەین.... وەرن با غەزاى کوشتنى تاریکى جاڕبدەین چونکە بەهەشتى روناکى بۆ ئێمەیە.
|
