|
ئەو
کاتەى بێدەنگى دەبێتە چەکێکى خۆکوژ .
محەمەدى مشیر
ماوەى 16 ساڵە هەردوو سوپاى
تورکیاوئێران لە گەڵ هەر پێشهات و گۆڕانێکى سیاسى ناوخۆى عێراق و
ناوچەکەدا، تەنانەت لەگەڵ ئەو گۆڕانکاریانەى لە ناوخۆى هەردوو وڵاتیشدا
روودەدەن، هەڵیدەدەنێ و هەر بە هەوەس ناوچە سنوورییەکانى هەرێمى
کوردستان دەدەنە بەر تۆپ و هاوەنەکانیان، وەک بڵێى هەردوو لا ناڕاستەخۆ
لە سیمفۆنیایەکى مەرگاوەرى درێژخایەنى هاوبەشدا قەرارو جەوابى سەداى
تۆپەکانیان تاقیبکەنەوە، ئیدى هەرکە یەکێکیان کپ بوو ئەویتریان
هەڵیدەداتێ و بەردەوام دەبێ.
دوو سوپا، دوو جۆرە سیستەمى دەسەڵات، بەڵام یەک جۆرە سیاسەتى
دوژمنکارانەى زەق و ئاشکرا بەرامبەر بە خەڵک و خاکى هەرێمى کوردستان.
دوو دژمنى دێرینەى یەکتر، دوو کلتورى جیاواز، بەڵام یەک هەڵوێستى
دڕندانەى بەردەوام بەرانبەر بە دەستکەوتەکانى گەلى کوردستان، دوو
پێشێنەى مێژوویى جیاواز بەڵام یەک هەڵوێستى مێژوویى نەگۆڕ بەرامبەر بە
دۆزى رەواى کورد.
ئەمەى سەرەوە کورتەى هەڵوێستى دێرینە و نوێى حکومەتە یەک لە دواى
یەکەکانى هەردوو دەوڵەتى(دراوسێ!) بووە، کەچى لە بەرامبەردا حکومەتە
یەک لەدواى یەکەکانى هەرێمى کوردستانیش هەر لە سەردەمى (فیفتى
فیفتى)یەوە بگرە تا دوو ئیدارەیى و دواتر 42 وەزارەتى و ئێستاش 17
وەزیرى، دەنگى هەڵوێستەکانمان بە نوڕەى تۆپێکى ئەوان کپ و خامۆش دەبێ و
زۆر (دیپلۆماتیانە) دەڵێن ئاغا (میبەخشی) و قارداش (باغشلە)زەحمەت نەبێ
بۆچى خەڵکمان بێلانە و خاکمان سووتماک دەکەن؟.. فەرموون.. بویرن.. با
لە رێگە تاقیکراوە بێسوودەکەى پار و پێرار و بەستر پێرارەوە، کە تێیدا
تەنها گوێمان لە سەداى دەنگى لاوازى خۆمان دەبێت، کێشە سنوورییەکانمان
لە سەر مێزى دیالۆگ چارەسەر بکەین .
عەجیب ئمورى ئەو دوو وڵاتە غەریب قەزییەى خەڵکى کوردستان.. لە گەڵ
دووبارە بوونەوەى هەر تۆپبارانێکدا پەرلەمانە سەد و یازدە
ئەندامییەکەمان بە ئامادەبوونى حەموو وەزیر و بەرپرسە باڵاکانى شئوونى
وڵات و ئەحوالى عاممە بە پەلە کۆدەبێتەوە و حەمموو جارێکیش بە تێکڕاى
دەنگ تۆپبارانەکە ئیدانە دەکات بێئەوەى تەنانەت جارێکیش بیر لە
گرتنەبەرى شێوازێکى جیاوازتر بکرێتەوە و پێیان بڵێن ئەرێ (ئاغا) هەرچى
کەرستە و ئامێرى قورسى وڵاتەکەم هەیە ئاودیوتانکرد و لە بەرامبەریشدا
پفەک و چیپسى ئاشى ماشى و چەسپى دووقولومان بۆ دەنێرن لە گەڵ ئەوەشدا
هەر قسەمان نەکردوو گوتمان قەیدى ناکا (هەمسایە ئەست)و وەحەقول
هەماسەیەتى عەلەل هەمسایە...، هەرچى سفر و فافۆنى ئەو وڵاتە هەبوو
تاڵانتان کرد و لە بەرامبەریشدا مەلامین و قاپى پلاسکۆمان بۆ دەنێرن
هەر گوتمان ئەو جارەش قەیدى ناکا خۆ مۆدیلى قاپى فافۆن بە سەرچووە و
قەیدى چییە، ئەمما ئەتو قارداش خەنى بووى هەندى نەفت و مازۆتى وڵاتەکەم
ببەیى و لە بەرامبەریشدا ئاوى موقەتتەر و پەنیر و ماستى تورکیم بۆ
بنێرى هەر گوتمان ئیشتەم جیرانە و عەیبە با قازانج بکا، رێگەمان دا
هەرچى کۆمپانیا وار ئیشتەم بێتە کوردستان و بەرزەکۆپرى ئاخیر مۆدێلمان
بۆ دروست بکا لە بەرامبەریشدا هەر جارەو بە بیانوویەک دەروازەى
سنوورەکانتان بەڕووى ئێمەدا دادەخست هەرگوتمان قایدى یۆختى قۆمشییە...
ئەمانەو دەیان شتى دیکە هەبوون و تائێستاش ماون کە خڕ بەرپرسانى ئەو
وڵاتەى لە مەڕ خۆمان دەیزانن، بەڵام بە داخەوە تا ئێستاش بە شێوەى
پێویست و وەک هەڵوێستێکى کارا پێداگریان لە سەر نەکراوە، هەرگیز بیر
لەوە نەکراوەتەوە کە بایکۆتى ئابوورییانەى کەلوپەلى بیانى چەکێکى هەرە
کاریگەرەو بارتەقاى هەزاران بەیاننامە و لێدوانى فەرمى کاریگەرى
راستەوخۆ و بەرچاوى هەیە، بەڵام مخابن ئەگەر ئەو جۆرە قسانەش بکەین
دەڵێن ئەدى نازانى کوردستان لە هەر چوار لاوە خنکێنراوە؟ ئەگەر وابکەین
خنکێنراوترمان دەکەن و ئەو بڕە ئاشى ماشى و پفەکە ئێرانییەو ئەو قیچە
پەنیر و زەیتونە تورکییەش نامێنێ بیدەینە منداڵەکانمان و، بازاڕەکانمان
چۆڵ و هۆڵتر دەبن ئەو کاتە ئەینەل مەفەڕ؟
راستە هەڵکەوتى جوگرافیاى کوردستان ئاوایە، بەڵام تا ئاوا بیربکەینەوە
و بیر لە رێوشوێنێکى دیکە نەکەینەوە لەتەک رێوشوێنە تەقلیدییەکان
وەگەڕبخرێن، ئەوا هیچ گومانى تێدا نامێنێ کە خنکێنراوتر دەبین و هەر
جارەى لە جیاتى تۆپێک هەزاران گوللە تۆپ بە تەوێڵى ناوچە
سنوورییەکانمان وەدەنێن و دوور نییە لە داهاتووشدا لە ئەنجامى ئەو
بێدەنگییەى ئێمە قوڵایى شارەکانیشمان هەر بە هەوەس تۆپباران بکەن.
|
