حکومەت، پەرلەمان و وەزارەتی پەروەردە
فریامان بکەون!

ئامادەکردنی:     

سەلام عەبدوڵا   

((دەتانەوێ ناومان بە 16کچە شەهیدەکەی خانەقین بهێنن؟!))
 

لەراستیدا دەرچوانی پۆلی شەشی تاقە قوتابخانەی ئامادەیی بەزمانی کوردی لە خانەقین(ئامادەیی راپەڕین)، چاوەڕوان بوون، پاش سەرکەوتنیان لە پۆلی شەش، لە زانکۆ و پەیمانگاکانی کوردستان وەربگیرێن، بەڵام مەخابن تا ئەم چرکەساتە هەموو هەوڵەکانیان بەفیڕۆ رۆیشتووە. ئەم قوتابیانە دەیانەوێت یەک بە یەک دەنگی خۆیان بەرێگای رۆژنامەی(ئاسۆ)، بە بەرپرسەکان بگەیەنن بەو ئومیدە کێشەکەیان چارەسەربکەن.

قوتابی نارین فوئاد وتی:

ئێمە لە قوتابخانەی کوردی خوێندوومانە و عەرەبی نازانین، کەچی ناومان لەو پەیمانگانە دەرچووە کە بەزمانی عەرەبی بەڕێوەدەچن.
داوا لە بەرپرسەکان دەکەین کێشەکەمان بۆ چارەسەر بکەن، چونکە ئێمە ناتوانین بۆ ئەو ناوچانە بڕۆین و تاقە چارەسەر ئەوەیە لە زانکۆ و پەیمانگاکانی کوردستان وەرمانبگرن.

قوتابی(هاوژین خەلیل) وتی:

ئەی هاوار من بەهیچ شێوەیەک عەرەبی نازانم و لە پۆلی یەکەمەوە بە کوردی خوێندوومە، چی بکەم لە پەیمانگەیەک بە زمانی عەرەبی وانەی تێدا بگوترێ؟! ئایا حکومەتەکەم دەیەوێ بەم شێوەیە کێشەی گەنجان و بەتایبەتی کچان چارەسەر بکەن؟ بۆچی من ببمە کچی نێوماڵ؟ بۆچی رێگای زانست بەڕودا دادەخەن؟

تارا خەلیل لەم بارەیە وتی:

حکومەتی کوردستان دەیەوێ ماددەی 140چێبەجێ بکرێ، کەچی کێشەی 16 قوتابی کوردستانی چارەسەر ناکات!

شیلان مەحەمەد وتی:

بەرپرسەکانمان تازە بە تازە بۆ قوتابخانە عەرەبییەکان دەمانێرن و بەڕەوای دەزانن بۆ(ێوێرە، حوێجە، کوت و باقوبە)بمانێرن. تاقە تاوانی ئێمە لەم چارەنووسە رەشە، ئەوەیە، بە کوردی خوێندوومانە!
ئایا بەڕێزتان دەتانەوێ بە(16کچە شەهیدەکەی خانەقین) ناومان ببەن؟!
تکامان وایە لە زانکۆ و پەیمانگاکانی کوردستان وەرمان بگرن!

جوان یاسین بە نیگەرانییەکەوە وتی:

ئێمە بە هەموو کەموکوڕییەکانی قوتابخانەکەمان، بە رەنج و کۆششی خۆمان لە تاقیکردنەوەی پۆلی شەش دەرچووین تا ناوی خۆمان و کەسوکار و شارەکەمان بەرزڕابگرین، ئێستا بەم شێوەیە پاداشتمان دەدەنەوە؟! ئاخر بۆچی نمرەی بەرزمان وەرگرتووە و ناومان لە پەیمانگا دەردەچێ و خۆزگا پەیمانگاکەش لە کوردستان بوایە!

دیمەن ئەحمەد زۆراب:

من نازانم بۆ چی بۆچی بەرپرسە بەرێزەکان پاش خەباتێکی دوور و درێژ، دەبنە هۆی تاڵکردنی ژیانمان؟! تکایە دواڕۆژمان مەسووتێنن!

بەناز جەوهەر بە توڕەیی و نیگەرانییەوە پرسیاری کرد:

من نازانم بۆچی زانکۆی خانەقین، قوتابیانی کوردستان وەردەگرێ، کەچی ئێمەیان پشتگوێ خستووە، تەنانەت زانکۆ و پەیمانگاکانی کوردستانیش وەرمان ناگرن. ئەمە چەندی بەچەنە؟ کوا لۆژیک؟ کوا بە کوردستان ناسینی خانەقین؟ کوا خزمەتکردنی گەنجان؟

سارا نسیف وتی:

ئێمە کەسوکاری نەوەی بەزۆرەملی تەعریبکراو، ئەنفالکراو و زیندانیکراوین، لەبری ئەوەی حکومەتی کوردستان خەممان بخوات، دووبارە بە دەردی تەعریبمان دەبات! سوپاس بۆ ئێوە!

میدیا ئیسماعیل:

شوکور ناوی قوتابخانەکەمان(راپەڕین)ە، کەچی دەسەڵاتی راپەڕین وا خەریکە دەبێتە هۆی ئەوەی ژیانمان وێران بکات.
حکومەت و راگەیاندنەکان زۆر باسی ئازادی ژنان دەکەن، کەچی وا خەریکە بمانکەن بە کچ و ژنی نێو ماڵ، ئاخر ئەگەر لە کوردستان وەرنەگیرێین، ئەوا ئێمە لەبەر ئەوەیش کە عەرەبی نازانین، بە هیچ شێوەیەک ئامادە نین لە زانکۆ و پەیمانگا عەرەبییەکان بخوێنن، چونکە هیچی لێ سەوزنابێ. دووبارە تکاتان لێ دەکەین بە زووترین چارەسەری کێشەکەمان بکەنو لە زانکۆ و پەیمانگاکانی کوردستان وەرمانبگرن...

قوتابی شیلان مەحەمە حەزی کرد تەنها بە کوردتی بڵێ:

ئێمە کوردین، کوردمان دەوێ،                                        
کوردستان نەبێ، نامانەوێ...! 

07701929872
dwaroj@yahoo.de