|
٢٦\٩\٢٠١٢
لێدوانەکەی ''کاک
خالید عەزیزی'' چی دەگەیەنێ؟
جەلال محەمەد
- بەشی دووەم -
"راستی" و "هیوا"دا:
ناشیرینترین کردەوە ئەوەیە کە بە بێ بوونی هیچ بەڵگەیەک دیرۆکی ژیانی
مرۆڤێک "چ بە باش و چ بە خراپ" بگۆڕیت کە ئەو مرۆڤە لە ژیاندا نەمابێت،
پارتی دیموکراتی کوردستانی عێراق یەک لەو لایەنانە بووە کە هەمیشە
هەوڵی شێواندنی کردەوە و ڕاستینەی ئەو مرۆڤانەی داوە کە لە ژیاندا
نەماون، بۆ نموونە بە لای پارتی‌یەوە زۆر ئاسایی بووە کە هەوڵی
شێواندنی دیرۆکی پڕشنگداری شەهید کاک ئارام بدات و پەیکەرەکەشی
بڕوخێنێت، لە بەرامبەریشدا هیچ پێی شەرم نەبووە کە هەرچی ئەنفالکەر و
مستەشار و خیانەتکارە لەخۆی کۆبکاتەوە و بەو شێوەیەی مەبەستیانە وەک
کەسانی شۆڕشگێڕ ناویان بهێنن.
هەڵبەت شێواندنی ڕاستیەکان و دیرۆک داتاشین بۆ مرۆڤەکان تەنها پیشەی
پارتی دیموکراتی کوردستانی عێراق نەبووە بەڵکو ئەوەی لەم کردەوە
قێزەونەدا سەرقافڵە بووە و بۆڕی ماڵی بارزانیشی داوەتەوە حیزبی
دیموکراتی کوردستانی ئێرانە کە "ڕاستی"یان بە "هیوا" پێناسە کردووە.
بۆ نموونە کاتێک پرسیاری یەکگرتنەوەی دیموکراتەکان دێتە گۆڕێ ، خالید
عەزیزیش دەڵێت:
[سیاسەتی ئێمە سەرکەوت، عەقڵییەت و قسەی ئێمە بۆ یەکگرتوویی، چووە ناو
کۆمەڵانی خەڵک لە ناوخۆی وڵات.].
ئاشکرایە کە حیزبی دیموکرات سیاسەتی "گرەوکردن لەسەر ئەسپی تۆپیو"
پیادە دەکات و ئەم سیاسەتەش نەک هەر سەرکەوتوو نابێت بەڵکو هیواخواستنە
بۆ سەرکەوتن.
واتە ڕاستی و هیوا دوو وشەی جیاوازن ، "ڕاستی" ئەو دیاردەیەیە کە ڕوو
دەدات بەڵام "هیوا" دیاردەیەکە مەرج نییە ڕوو بدات . حیزبی دیموکراتیش
تەکە حیزبە کە زۆرترین هیوای خواستووە بەڵام هیچ یەک لە هیواکانی
نەبۆتە ڕاستی . ئەنجامی بەڕاستی نەبوونی هیواکان پەیوەستە بە سیاسەتی
چەواشەکاری و فریودەرانەی حیزبی دیموکرات کە "هیوا و ڕاستیان" لە یەکدی
جیانەکردۆتەوە ، واتە هەمیشە هیوای بە ڕاستی پێناسە کردووە.
بۆ نموونە تەسلیمبوونی پێشەوا قازی محەمەد "ڕاستیە" و ئەگەر پێشەوا
بیزانییایە ئیعدام دەکرێت ئەو ڕێگەیەی هەڵنەدەبژارد ، بەڵام "هیوای"
حیزبی دیموکرات ئەوەیە بڵێت تەسلیمبوون ڕووی نەداوە و پێشەواش بۆ
ئیعدامکردن ئەو ڕێگەیەی هەڵبژارد.
دانیشتنی نهێنی دکتۆر قاسملو و چەند وردە پاسدارێک "ڕاستییە" و ئەگەر
قاسملو بیزانیبایە تیرۆر دەکرێت نەک هەر دانیشتنی ئەنجام نەدەدا بەڵکو
وەسیەتەکەی بابی لەبەر چاو دەگرت کە گوتبووی "بەبینینی عەجەم هەڵبێ" ،
بەڵام "هیوای" حیزبی دیموکرات ئەوەیە بڵێت دکتۆر قاسملو دەیزانی تیرۆر
دەکرێت بەڵام لە پێناو ئاشتیدا تیرۆرکردنی پەسەند کردووە.
هەڵهاتن و ئۆردوگانشینی حیزبی دیموکرات لە لایەک و فەرامۆشکردنی میلەت
و سپاردنیان بە چارەنووس لە لایەکی دیکەوە "ڕاستی"یە ، بەڵام "هیوا"ی
حیزبی دیموکرات ئەوەیە بڵێت هەمیشە لە مەیدانداین و ئەزمون و دەسکەوت
دەپارێزین و شەو و ڕۆژ خەریکی حەماسە خوڵقێنین.
ئێستاش کاک خالید عەزیزی هەمان "هیوا" دەخوازێت و دەڵێت {قسەی ئێمە
سەرکەوت و چووە ناو کۆمەڵانی خەڵک لە ناوخۆی وڵات} ، بەڵام "ڕاستی"ەکەی
ئەوەیە کە هەڵهاتنەکەی خالید عەزیزی هیچی وای لە هەڵهاتنەکەی مەلا
عەبدوڵای حەسەنزادە کەمتر نییە و زۆربەی هەرە زۆری ژیانی لە ئۆردوگا و
دوورە وڵاتی بەسەر بردووە و لە دوور و نزیکەوە ئاگاداری ناوخۆی وڵات
نییە ، کە ئەم فەرمایشتە بە ناوی هەموو خەڵکی ناوخۆی وڵاتەوە دەدات.
بە باوەڕی من سیاسەتەکانی کاک خالید و حیزبەکەی لە دوو بواردا سەرکەوتو
بوون:
١- سەرکەوتن لە لێکترازان و لەتوپەت کردنی حیزبی دیموکرات . ئەندازیاری
ئەم بوارە مەلا عەبدوڵای حەسەنزادەیە.
٢- سەرکەوتن لە خۆنواندن و تۆمەت هۆنینەوەی ناڕەوا و برەودان بە
ڕاگەیاندنی داگیرکەری تورک . خالید عەزیزی ئەندازیار بووە لەم بوارەدا.
پاشان پرسیار لە کاک خالید دەکرێت :- پێت وا نییە ڕێککەوتننامەکە ببیتە
بەربەست لە بەردەم دروستبوونی بەرەیەکی فراوان؟
خالید عەزیزی: [ئەوان لە ڕێککەوتنەکەدا گوتوویانە دوو حزبی سەرەکی، بە
ڕاستی سەرەکی نین].
بریا خالید عەزیزی وەکو ددانی بەو ڕاستیەدا ناوە کە ئەو دوو حیزبە
سەرەکی نین ، کەمێکیش باسی لە حیزبی سەرەکی بکردایە تاکو بمانزانیایە چ
حیزبێک سەرەکییە ، چونکە هێندەی من بزانم حیزبەکەی کاک خالیدیش نەک هەر
سەرەکی نییە بەڵکو لە دیدی حیزبی دیموکراتەوە هێشتا (برادەرانی دابڕاون
و شەرعیەتیان نییە و ناسنامەی حیزبیشیان وەرنەگرتووە و تەنها بۆ
شێواندنی ناوی حیزبی دیموکرات سود لە هەمان ناو وەردەگرن) ، کە ئەم
گوتانەش لە هەموو کۆبونەوەکانی حیزبی دیموکراتدا باسی لێ دەکرێت.
ئەو دوو حیزبە لەم ڕێکەوتنەدا باسیان لە حیزبی سەرەکی کردووە و کاک
خالیدیش زۆر بە ڕاشکاوی ددان بەو ڕاستیەدا دەنێت کە حیزبی سەرەکی نین .
بریا کاک خالید یەک ڕاستی دیکەشی ئاشکرا بکردایە ئەویش بانگەشاکەنی هەر
دوو لایەنی ناوبراوە بۆ ڕەسەن بوون ، چونکە وەک بانگەشەی ڕەسەن بوونیان
کرد پێناسەی ڕەسن بوونیان لە بیر کرد ، کە بە باوەڕی من جوانترین
پێناسە بۆ ئەو بانگەشەیە "ئۆردوگانشینی ڕەسەنە".
____________________________________________________
بەشی یەکەم:
http://www.emrro.com/lediwanekeykakx1.htm
ماڵپه‌ڕی جه‌لال
محه‌مه‌د
|
