٦\٧\٢٠١٤

تا کەی کورد ناتوانێ

دەرفەتی گرنگ بقۆزێتەوە تا هەڵەی مێژوویی دووبارە نەکاتەوە.

شوان عوسمان      

زۆرجار هەل رێک ئەکەوێت بەڵام ئەوەی گرنگە قۆزتنەوە و پاراستنی تاسەر دەرفەتی هەلەکەیە، نەک بە دەستی خۆت دەرفەتێک بدەیتە دەست تا هەلەکەت بدۆڕێنیت ، ئەوەش ببێتە هۆی روودانی هەڵەیەکی گەورەتر، دەبێت لە کاتوساتی دیکە نەتەوە خۆی باجی هەڵەکانت بداتەوە، گەلێکجار هەلی بە نرخ بۆ کورد هاتۆتە پێش، بەڵام کەمجار ئەو هەلە چووەتە خزمەت بەرژەوەندیەکانی نیشتیمان و نەتەوە، کورد تا ئێستا لە مێژووی خۆیدا زۆر دەرفەت وهەلی لە دەستچووە بەناو و فێل و بەرژەوەندی ئایینی و نیشتیمانی نەیارەکانمان، ئەمڕۆکە پێویستە هەر هەموومان لەوە ئاگادار بین ونەهێڵین هەڵەیەک دووبارە ببێتەوە کە زۆرینە ببینە قوربانی دەست کەمینەیەکی دەسەڵات، هەول بدەین لە بڕیار و بیرکردنەوەی چارەنوسسازدا دوورەپەرێز نەبین..

سیاسیەکان لە هەموو جیهاندا بەرپرسیارن لە بڕیاری چارەنووسی وڵات ونەتەوەدا بەڵام ئەوان زۆرجاریش دەبنە هۆکاری روودانی هەڵەی گەورە وکارەساتی مەزن، هەروەها گەلێکجار بێدەنگی هاوڵاتی و بێ هەڵوێستی و دوورەپەرێزیان، سیاسەتوانی گەندەڵ و درۆزن دێنێتە بەرهەم ، ناکرێ هەر هەموومان بڕیار بدەین بەڵام دەکرێت کاریگەرمان لەسەر بیر کردنەوەی سیاسیەکان هەبێت تا نەتوانن بڕیارێک بدەن لە خزمەت نەتەوەکەیان نەبێت، ناکرێ خەڵکی بە ئاگا رۆلی نەبێت ورۆشنبیران وخوێندەوارانیش لە دوورەوە تەماشای رووداوەکان بکەن، هەمیشە ئەوانەی رێ بۆ بڕیاری بوێر خۆش دەکەن رۆشنبیرانی ئازاد و ئازان کە ناهێلن بە ئاسانی هەلی گەورە وزێڕین لە دەست نەتەوەکەیان بڕوات..

ئەمڕۆکە دوای ئەو گۆڕانکاریە سیاسیانەی لە گۆڕەپانی (عێراق) روو دەدات هەلێکی باش بۆ کورد هاتووتە ئاراوە، هاوکات رۆلێکی دیاری خۆشی گێڕاوە کە ناتوانرێت فەرامۆشی بکرێت، بەڵام ناکرێت بە هەمان عەقلیەت و بریاری بەر لەو جەنگە بیر لە دەستکەوت و ئایندەی خۆی بکاتەوە، دەبێت ئەوە بزانێت هەڵی ئەوجارە وەکو هەڵی هیچ جارێک نیە، هەڵەکانیش ئەگەر دووبارە ببنەوە وەکو هەڵەی هیچ جارێکیش لە رابردوو نابێتەوە، کورد ئەمڕۆکە زەمەنی گۆڕاوە و لە سەر ئاستی جیاوازێشدا کیان و کێشەکانی گۆڕانیان بەسەردا هاتووە چ لە رووی ناوەخۆ و چ لە رووی دەرەوەدا، بەلام ئەگەر ئێمە لە ئاستی ئەو ئەرک وبەرپرسیاریانەدا نەبین ئەوا بێگومان هەڵەکان دووبارە دەبنەوە، گۆڕانی تازە ئەگەر بە هەمان عەقلیەت و هەستی کۆنەپارێزیەوە بێت و کورد پلانی تازەی نەبێت گۆڕانکاری گەورە چی بۆ بکات..

ئەوەی لە (عێرا‌ق) روو دەدات هەرچەندە لە سەرووی پلان و ئیرادەی کوردە چونکە ئەوە پلانێکی داڕێژراوی زەمەنێکی دوورودرێژە چەند وڵاتێکی زلهێز ئەوانەی کە لە ماڵی خۆیان بڕیار لە چارەنوسی گەلان دەدەن، گەڵانی وەکو ئێمەش لەگەل جێبەجێ کردنی بڕیارەکان بە خەبەر دێینەوە، (عێرا‌ق) ئەو وڵاتە خۆشی بێت یان ترشی دەبێت پارچە پارچە دەبێت و ئاگری شەڕەکەش هەر لەوێوە ناوەستێت ودەپەرێتەوە بۆ ئەو وڵاتانەی بە ناوی ئیسلام هاوردەی تیرۆریست دەکەن، گۆڕانێکی گەورە بەڕێوەیە پێمان خۆش بێت یان نا هەر دەبێت روو بدات، کەسیش ناتوانێت رێی لێ بگرێت، بەڵام کورد چی بکات باشە لە دژی بوەستێت یان لەگەلیدا بڕوات، پێم وایە لەبارترە لەگەلێ بڕوات بەڵام با رۆلێکی نەتەوەیی و نیشتیمانی بۆ خۆی بگێڕێت و بکەوێتە دوای دەستکەوتی نەتەوەیی خۆی نەک دەستکەوتی نەتەوەیی نەیارەکانی وەکو لە رابردوودا ئەوەی کردووە..

رازی بوونی ئەمڕۆکەی (تورکیا) لەسەر گۆڕانی باری کورد لەناو هاوکێشە سیاسیەکاندا بە تایبەتی ئەو خاڵە سوورانەی تا دوێنێ ترسێکی گەورە بوون بۆیان (کەرکووک) و(تورکمان)... لە خۆڕا نیە و دەزانێت ناتوانێت دژ بەو باهۆزە راوەستێت، هەروەها لێدوان و قسە مێژووییەکانی سەرۆک و وەزیری دەرەوەی ئیسرائیل ئەوانیش باش دەزانن ئەو گۆڕانە گەورەی بەڕێوەیە دونایی ئیسلامی دەگۆڕێت بۆیە ئەوانیش لە بڕی ئێمە قسە دەکەن، هەروەها لە دوورەوە تەماشا کردنی ئەمریکیەکان و بێدەنگ بوونیان بەرامبەر ئەو گۆڕانکاریانەی بەو دواییە هاتوونەتە پێش خۆی لەخۆی مایەی تێڕامان و هەڵوێست گرتنە ئەوەش پێمان دەلێت ئەوجارە شتێکی زۆر گەورە روو دەدات کە لە زەینی ئێمەدا نیە، هەروەها روانینی چەندین گۆڤار و رۆژنامە جیهانیەکانیش، ئەوانە هەر هەموویان باس لە هاتنی هەلی زێڕینی کوردی و گۆڕانی گەورەی سیاسی دەکەنەوە، ئایا ئێمە خۆمان لەبەرامبەر ئەو گۆڕانانەوە ئامادەین بەیەک دەنگ و بەیەک هەڵوێست رووبەروویان ببینەوە..

کێشەکەی ئێمە ئەوەیە ئێمە خۆمان لەناو ئەو گۆڕانکاریە گەورەیەدا زۆر گچکەین و دەنگمان زۆر بەربڵاو و چەند رەنگیە، (پارتی) کە حکومەت و سەرۆکایەتی هەرێمی لە دەستە خۆی بە بەرژەوەندیەکانی (تورکیا) هەڵواسیوە و رۆژانە بە چەند رەنگ و دەنگی جیاوازەوە لێدوان دەدات تەنانەت خۆشیان لە خۆیان ناگەن کە چی دەکەن، (یەکێتی) تا ئێستا زۆر باشی هێناوە کە شەڕی )(داعش) دەکات و کۆنترۆڵی ناوچە کوردنشینەکانی دەرەوەی هەرێمیشی کردووە، رۆژانە پێشمەرگەکانی دەبنە قوربانی، هاوکات ئەویش تا ئێستا نەیتوانیوە خۆی لە تۆق و کۆتی بەرژەوەندیەکانی (ئێران) دەربێنێت، (گۆڕان) هەر باس کردنی ناوێت هەروەکو بزنەکەی ناو جۆگەی لێهاتووە نازانێت دەم بۆ کام گیا باشە ببات، بەڵام لە نێوان هەردوو بەرداشدا ئەوجارە زۆر بە خراپی خۆی دەهاڕێت و زەمەنی ئەویش دەگۆڕێت ئەگەر ئەوها بڕوات، لایەنەکای دیکەش باوەڕ ناکەم بتوانن کاریگەریان لەسەر ئەو سێ هێزە هەبێت تا ببنە یەک دەنگ، پارچ پارچە بوونی ئەو دەنگ و بەرژەوەندیانە لەوانەیە زیانێکی گەورە لە دەستکەوتەکانی کورد بدات ئەگەر زوو نەکەونە خۆیان و بیر لە یەک دەنگی نەکەنەوە.....

کێشە و مەسەلەی چارەنووسی نەتەوەکەمان لە هەموو بەرژەوەندیەکی ئەو هێزە سیاسیانە گەورە ترە بەڵام ئەوان بە خۆیان کێشەکەمان گچکە دەکەنەوە، بۆیە ئەوە دەخوازێت خۆمان بگۆڕین و خۆمان لەگەل زاراوەو چەمک و هاوکێشەی تازەوە بگونجێنین تا هەڵەکان دووبارە نەکەینەوە، هەروەها هەلی زێرینیش لە دەست خۆمان نەدەین، هەڵومەرجی تازە پێ لەسەر ئەوە دادەگرێت کە جوگرافیای سەقەتی بە ناو (عێراق) کە لە رابردوودا بەسەر سەرمان سەپاوە مایەی هەڵوەشانەوە و شی بوونەوە بێت کاتی هاتووە هەڵەکان چاک بکرێنەوە و هەریەکە بە گوێرەی ژیان و خەڵکی خۆی جوگرافیایەکی خۆی هەبێت...

٢٠١٤ - هۆلەندە
ماڵپه‌ڕی شوان عوسمان

_________________________________

هەموو بابەتەکان دەربارەی ''داعش'' لێرە ببینە:

www.emrro.com/dosyeydahish.htm