1

هاتووم تاکو بەخوێنی هەر دەپەنجەکەم
لەمرواری پەڕەی ڕۆحم
یەک دێڕ وشەت، بۆ بهۆنمەوە
بەلاشەیەکی شەکەت و
دوولێو وشکء خەماوی، بڵێم ماڵئاوا
ئەی خواوەندی خۆشەویستی
وەفا،عەشق، خۆشەویستی
لەکوێیەو کوا ؟!

2
هاتووم تاکو دەستەکانت تێبگەیەنم
بۆ لەمەودوا هاوڕێی دەستەکانم نەبێ
چاوەکانت تامەزرۆی،بینینم نەبێ
زمانم دەیەوێ نەترسێ و بڵێ بڕۆ
تۆ لەمەودوا خۆشەویستی دڵم مەبە .

3
تاوان تۆیت و دڵم دەڵێ
بێنە کۆرپەی خۆشەویستیت بابڕۆین
ئەو بۆنی گوڵە نێرگز و میلاقە و بەیبوون
لەیەک جیاناکاتەوە
ئەو پەڕەی ناسکی گوڵەباخ و
دەمی تیژی دڕکیک
وەکو یەک ماچ دەکا ؟!

4
تۆ نەتزانی
من خەو بەچاوی ئەستێرەو
پەپوولەو مانگەوە دەبینم
دڵیشم لە ئاستیاندا
پەڕەی ناسکی گوڵێکە

5
ئێستا لەراوچیەک دەچیت
هەندێ جار وەک گیانلەبەرێکی دڕندەو
هەندێ جاریش وەک باڵندەیەکی بێدەسەڵات
سەیری جەستەی ژنێتیم دەکەیت
بۆیە زۆرجار واگەرەکتە
بەچەقۆ سەرم ببڕیت و
هەندێ جاریش
بەگوڵە چاوترسێنم بکەیت؟!

6
حەزدەکەم بزانی
من هاوڕێی ئەو شۆڕە ژنانەم
کەچۆن جورئەتیان بەئاگری
دۆزەخا کردوو
تۆپەڵێ خۆڵەمێشیان
بەیادگاری جێهێشت ؟!

7
چەند جوانە وشەی خۆشەویستی
ئەوکاتەی لەدەرونێکی پاکەوە
دێتە دەرێ
چەند پیرۆزە وشەی ماڵئاوایی
لەدوای خیانەت چاو هەڵدێنێ

8
هەرگیز نەکەی
داواى لێبووردنم لێبکەی
چونکە تۆ ناتوانی
فرمێسکە راژوەکانی چاوم کۆبکەیتەوە

9
من دەڕۆمء ئەبێ
یەک یەک پیتەکانی ناوی من
لەفەرهەنگی بیری خۆتدا بسڕیتەوە
نیگام بۆنم هەناسەکەم بنێریتەوە

10
بڕۆ ئیتر ناتبینمەوە
دەڕۆم ئیتر نامبینیەوە
کاتێک دڵشکا
عەشق شوێنی خۆی ناگرێتەوە؟!
 

Kazhal_3@hotmail.com