٤\١\٢٠٢٣

  زەنگیانەی ئاویی.

         - رستی سێزدەم -

فەتاح حەسەن

   بەهەشت.
هەرکەسێك خوا خۆشیبوێ
دەیخاتە بەهەشت
گەر دەتەوێ خوا خۆشیبوێی
خۆت برسی بکە و
برسییەك تێر.

    جینۆساید.
بڵێی کورد .. وەکو ئەبرەهە
فیلکێشی کردبێت،
بۆ ڕوخاندنی کەعبە..
وا بەناوی ئیسلامەوە
جینۆساید دەکرێ و
مسوڵمانی هەموو دنیا..
لێیبێدەنگن؟!

    تاڵیی و شیرینیی.
بۆ هەر قومە قاوەیەك و
جگەرەیەك
ماچێکم بەرێ..
ئەوجا پێتدەڵێم
هەردوکیان چەند شیرینن
لەگەڵ ماج.

    پێڵاو.
خوێندکارێك بەپێخاوسیی
ساڵی خوێندنی بەڕێکرد،
بەر لەوەرگرتنی نمرەکەی
چی پارەی دەخیلەکەی بوو
دای بەجوتێك پێڵاو..
بۆ مامۆستاکەی.

    راستییەکی تاڵ.
داپیرەیەك
دوای پێنج شوو
لەسەرەمەرگا
راستییەکی تاڵی درکاند
تاکە پیاو خۆشیویتبم
باوکم بوو.. چون
تەنها ئەو ئازاری نەدام.

    یادەوەرییەکی منداڵیی.
لەمنداڵیمەوە
گوێم بەوە دەزرنگێتەوە
دادوەر، داد دەسەپێنێ
گوێ بە پول و پارە نادا..
کەچی ئەمرۆ
سزای دادوەرێکیان دا،
بەتێوەگلان لەگەندەڵیی.
( قومارچی )
قومارچییەك وتی
بەخت یاوەرم نییە لە قومارا
هاوڕێیەکی وتی:-
ئەی.. خۆشەویستیی
ئەویش وتی:-
هەر لێیگەڕێ.

    گوڵی رەزاگران.
گوڵم ئەو کاتە پێ جوان نییە
کە، لەسەر،
گوڵکۆی ئازیزێك دەیبینم.

    بەزەیی.
دەمەوێت
شوێنێك بدۆزمەوە
تیایدا بگریم،
ئەمن بەڕق ئاشنا نیم
وەلێ
ڕقی ئەستورم
لەو کەسانەیە
کەدەگرێم،
دەبمە جێگەی، بەزەییان.

___________________________________________

رستی دوازدەم: www.emrro.com/zengiyaneyawiy12.htm

رستی یازدەم: www.emrro.com/zengiyaneyawiy11.htm

رستی دەیەم: www.emrro.com/zengiyaneyawiy10.htm

رستی نۆیەم: www.emrro.com/zengiyaneyawiy9.htm

رستی هەشتەم: www.emrro.com/zengiyaneyawiy8.htm

رستی حەوتەم: www.emrro.com/zengiyaneyawiy7.htm

رستی شەشەم: www.emrro.com/zengiyaneyawiy6.htm

رستی ێنجەم: www.emrro.com/zengiyaneyawiy5.htm

رستی چوارەم: www.emrro.com/zengiyaneyawiy4.htm

رستی سێیەم: www.emrro.com/zengiyaneyawiy3.htm

رستی دووەم: www.emrro.com/zengiyaneyawiy2.htm

رستی یەکەم: www.emrro.com/zengiyaneyawiy1.htm

دانیمارك / ڤالبی
ماڵپەڕی فەتاح حەسەن